Bible

1 Եւ տեսայ ուրիշ հրեշտակ մը, որ երկինքէն կ՚իջ–նէր եւ ձեռքին ունէր անդունդի բանալին եւ մեծ շղթայ մը։ 2 Անիկա բռնեց վիշապը, այն առաջին օձը, որ Բանսարկուն եւ Սատանան է, եւ հազար տարուան համար շղթայեց զայն։ 3 Հրեշտակը զայն անդունդ նետեց, կղպեց եւ կնքեց կղպանքը, այնպէս որ այլեւս չմոլորեցնէ ազգերը, մինչեւ լրանայ հազար տարին։ Անկէ ետք կարճ ժամանակուան մը համար պէտք է ազատ արձակուի։ 4 Յետոյ տեսայ գահեր, որոնց վրայ նստան անոնք՝ որոնց իշխանութիւն տրուեցաւ դատելու։ Տեսայ նաեւ այն հոգիները, որոնք Յիսուսի եւ Աստուծոյ խօսքին իրենց տուած վկայութեան համար չարաչար գլխատուած էին։ Ասոնք չէին երկրպագած գազանին եւ անոր կնիքը չէին դրոշմած իրենց ճակատներուն եւ ձեռքերուն վրայ։ Անոնք վերակենդանացան եւ Քրիստոսի հետ հազար տարի թագաւորեցին։ 5 Մնացեալ մեռելներէն ո՛չ ոք կենդանացաւ, մինչեւ լրացաւ հազար տարին։ Ասիկա մեռելներու առաջին յարութիւնն է։ 6 Երանելի եւ սուրբ են անոնք, որոնք բաժնեկից են մեռելներու առաջին յարութեան։ Երկրորդ մահը ասոնց վրայ իշխանութիւն չունի. ասոնք Աստուծոյ եւ Քրիստոսի քահանաները պիտի ըլլան եւ Քրիստոսի հետ հազար տարի թագաւորեն։ 7 Երբ հազար տարին լրանայ, Սատանան ազատ պիտի արձակուի բանտէն։ Անիկա պիտի ելլէ ու մոլորեցնէ երկրի չորս կողմը գտնուող բոլոր ազգերը, Գոգն ու Մագոգը, եւ զանոնք պիտի հաւաքէ պատերազմելու համար. անոնց թիւը ծովու աւազին չափ անհամար է։ 8 Անոնք ամբողջ երկրի վրայ տարածուեցան եւ շրջապատեցին Աստուծոյ ընտրեալներուն բանակավայրը եւ սիրելի քաղաքը։ 9 Սակայն երկինքէն, Աստուծմէ կրակ տեղաց եւ լափեց զանոնք։ 10 Իսկ Բանսարկուն, որ զանոնք մոլորեցուց, կրակի եւ ծծումբի լիճը ձգուեցաւ, ուր գազանը եւ սուտ մարգարէն արդէն ձգուած էին. այնտեղ պիտի չարչարուին գիշեր ու ցերեկ, յաւիտեանս յաւիտենից։ 11 Յետոյ տեսայ ճերմակ մեծ գահ մը եւ անոր վրայ բազմած մէկը, որուն ներկայութենէն փախան երկինքն ու երկիրը՝ առանց հետք մը ձգելու։ 12 Եւ տեսայ մեռելները՝ մեծ ու փոքր, որոնք գահին դիմաց կանգնած էին։ Գիրքերը բացուեցան եւ ապա բացուեցաւ ուրիշ գիրք մը — Կեանքի գիրքը։ Մեռելները դատուեցան իրենց գործերուն համաձայն, որոնք արձանագրուած էին անոնց մէջ։ 13 Ապա ծովը յանձնեց իր մէջ գտնուող մեռելները. նոյնը ըրին մահն ու դժոխքը, եւ իւրաքանչիւր մեռեալ դատուեցաւ իր գործերուն համաձայն։ 14 Յետոյ մահն ու դժոխքը կրակի լիճը ձգուեցան։ Այս է երկրորդ մահը, որ կրակի լիճն է։ 15 Եւ ան՝ որուն անունը չկար Կեանքի գիրքին մէջ՝ կրակի լիճին մէջ ձգուեցաւ։