Revelation 18— 2019

¹Ասկէ ետք տեսայ ուրիշ հրեշտակ մը, որ երկինքէն կ՚իջնէր. անիկա մեծ իշխանութիւն ունէր, եւ իր փառքէն երկիրը լուսաւորուեցաւ։

²Հրեշտակը հզօր ձայնով աղաղակեց.– «Ինկա՛ւ, ինկա՜ւ մեծ Բաբելոնը, եւ բնակավայր եղաւ դեւերու եւ արգելարան՝ ամէն տեսակի պիղծ ոգիներու. բանտ եղաւ բոլոր անմաքուր թռչուններուն եւ անմաքուր ու ատելի գազաններուն։

³Որովհետեւ բոլոր ազգերը անոր պոռնկութեան բարկ գինիէն արբեցան եւ երկրի թագաւորները անոր հետ պոռնկութիւն ըրին. այս աշխարհի վաճառականները անոր անչափ զեղխութենէն անհամեմատ հարստացան»։

⁴Ապա երկինքէն ուրիշ ձայն մը լսեցի, որ կ՚ըսէր.– «Դո՛ւրս ելէք այդ քաղաքէն, ո՜վ իմ ժողովուրդս, որպէսզի չըլլայ թէ մասնակից ըլլաք անոր մեղքերուն, որպէսզի չըլլայ թէ դուք ալ ընդունիք անոր պատիժը։

⁵Որովհետեւ անոր մեղքերը մինչեւ երկինք դիզուեցան. Աստուած յիշեց անոր ամբարիշտ գործերը։

⁶Արդ, դուք ալ Բաբելոնին հատուցէք այնպէս՝ ինչպէս ինք վարուեցաւ ձեզի հետ, կրկնապատիկը տալով անոր՝ իր գործերուն փոխարէն։ Այն բաժակը որ պատրաստեց ձեզի համար՝ լեցուցէ՛ք զայն կրկնապատիկ սաստկութեամբ։

⁷Այնքան՝ որքան ինքզինք փառաւորեց եւ զեղխութեամբ ապրեցաւ՝ նոյնքան իրեն սուգ ու տանջանք հատուցէք, քանի կ՚ըսէր ինքնիրեն.– “Միշտ թագուհի պիտի մնամ, ես այրի չեմ եւ սուգ բնաւ պիտի չտեսնեմ”։

⁸Այս պատճառով՝ մէկ օրուան մէջ անոր վրայ պատուհասներ պիտի գան, ե՛ւ մահ ե՛ւ սուգ ե՛ւ սով, ու պիտի հրկիզուի կրակով, որովհետեւ հզօր է Տէր Աստուածը, որ զայն կը դատէ»։

⁹Աշխարհի թագաւորները, որոնք անոր հետ պոռնկութիւն ըրին ու զուարճացան, պիտի ողբան, լաց ու կոծ ընեն, երբ տեսնեն անոր հրկիզման ծուխը։

¹⁰Անոր տանջանքին վախէն հեռու պիտի կանգնին եւ ըսեն.– «Վա՜յ, վա՜յ քեզի, մե՛ծ քաղաք, դո՛ւն, Բաբելո՛ն, հզօ՛ր քաղաք, մէկ ժամուան մէջ եկաւ հասաւ դատաստանդ։

¹¹Աշխարհի վաճառականներն ալ պիտի ողբան ու սգան քու վրադ, որովհետեւ ալ ո՛չ ոք պիտի գնէ անոնց ապրանքը.–

¹²ոսկին, արծաթը, թանկագին քարերն ու մարգարիտները, բեհեզն ու ծիրանին, ոսկեթել կերպասը եւ կամ որդան կարմիրը, ամէն տեսակի խնկաբոյր փայտեր եւ փղոսկրեայ անօթ, ազնիւ փայտէ ամաններ, ինչպէս նաեւ պղնձեայ ու երկաթեայ, եւ մարմարեայ անօթներ։

¹³Ասկէ ետք ո՛չ ոք պիտի գնէ կինամոն, համեմ, խունկ, անուշահոտ, կնդրուկ, գինի եւ ձէթ, նաշիհ, ցորեն, արջառ ու ոչխար, ձի եւ ձիակառք, գերիներ եւ նոյնիսկ մարդիկ։

¹⁴Այո՛, ինչ որ ցանկացիր դուն քեզի համար՝ հեռացաւ քեզմէ. քու վայելչութիւնդ եւ փայլքդ չքացան, այլեւս պիտի չգտնե՛ս կրկին»։

¹⁵Բոլոր վաճառականներն ալ, որոնք անոր միջոցաւ հարստացան, անկէ հեռու պիտի մնան՝ վախնալով անոր տանջանքներէն, եւ լալով ու սգալով

¹⁶պիտի ըսեն.– «Վա՜յ, վա՜յ, մեծ քաղաք, որ կը հագնէիր բեհեզ, ծիրանի եւ որդան կարմիր, կը զարդարուէիր ոսկիով, անգին ակերով ու մարգարիտով,

¹⁷մէկ ժամուան մէջ այդքան հարստութիւնդ փճացաւ»։ Բոլոր նաւավարները եւ բոլոր անոնք, որոնք կը նաւարկեն տեղէ տեղ, նաւաստիներ եւ ձկնորսներ, հեռուները կանգնեցան

¹⁸եւ տեսնելով հրկիզումի քու ծուխդ՝ կ՚աղաղակէին.– «Այս մեծ քաղաքին նման ուրիշ քաղաք կա՞ր»։

¹⁹Հող ցանեցին իրենց գլխուն եւ լալով ու սգալով՝ բարձրաձայն կ՚աղաղակէին.– «Վա՜յ, վա՜յ, մե՛ծ քաղաք, որուն ճոխութենէն հարստացան բոլոր նաւ ունեցողները. ա՜խ, ի՞նչպէս կործանեցար դուն մէկ ժամուան մէջ։

²⁰Ուրախացի՛ր անոր դատապարտութեան վրայ, ո՜վ երկինք, եւ դուք՝ սուրբեր, առաքեալներ, մարգարէներ, որովհետեւ Աստուած դատապարտեց զայն եւ ձեր վրէժը անկէ լուծեց»։

²¹Ապա հզօր հրեշտակ մը մեծ երկանաքարի մը չափ քար մը առաւ եւ ծով նետելով, ըսաւ.– «Այս նոյն ուժգնութեամբ պիտի իյնայ Բաբելոնը, մեծ քաղաքը, եւ յաւէտ պիտի կորսուի։

²²Պիտի լռեն բոլորը՝ քնարահարներ ու երաժիշտներ, սրնգահարներ եւ փողահարներ. ա՛լ ոեւէ արհեստ ի գործ դնող արհեստաւոր պիտի չգտնուի քու մէջդ. երկանաքարին ձայնը պիտի չլսուի քու մէջդ.

²³ճրագին լոյսը ա՛լ պիտի չփայլի քու մէջդ, փեսային ու հարսին ձայնը պիտի լռէ քու մէջդ, որովհետեւ վաճառականներդ աշխարհի հզօրներն էին, որովհետեւ բոլորն ալ, ամէն ազգեր, քու թունաւոր կախարդանքէդ մոլորեցան։

²⁴Ասոնք բոլորը պատահեցան, քանի Աստուած մէջդ գտաւ մարգարէներուն եւ Աստուծոյ ընտրեալներուն, երկրի վրայ սպաննուած բոլոր մարդոց արիւնը»։