Bible

1 Եօթը անօթները ունեցող հրեշտակներէն մէկը ինծի եկաւ, խօսեցաւ հետս եւ ըսաւ. – Հո՛ս եկուր, եւ ես քեզի ցոյց պիտի տամ այն դատապարտութիւնը, որուն պիտի ենթարկեմ հռչակաւոր պոռնիկը, այն քաղաքը՝ որ շատ ջուրերու վրայ կը նստի։ 2 Երկրի թագաւորները պոռնկութիւն ըրին անոր հետ եւ երկրի բնակիչները անոր պոռնկութեան գինիով գինովցան։ 3 Հրեշտակը հոգիով վերացուց զիս ու տարաւ անապատ, ուր տեսայ կին մը, որ նստած էր կարմիր գազանի մը վրայ, որ ծածկուած էր հայհոյալից անուններով։ Գազանը, որ տեսայ, եօթը գլուխ եւ տասը եղջիւր ունէր։ 4 Կինը ծիրանի եւ կարմիր հագուստ հագած էր եւ զարդարուած ոսկիով, մարգարիտներով եւ թանկագին քարերով։ Ձեռքին ունէր ոսկիէ գաւաթ մը, որ լեցուն էր գարշելի բաներով, պոռնկութեան աղտոտութիւններով։ 5 Անոր ճակատին գրուած էր խորհրդաւոր անուն մը – «Մեծ Բաբելոն, մայր պոռնիկներու եւ երկրի գարշելիքներուն»։ 6 Տեսայ որ այդ կինը գինովցած էր Աստուծոյ ընտրեալներուն եւ Յիսուսի վկաներուն արիւնով։ Երբ զայն տեսայ՝ շատ զարմացայ։ 7 Հրեշտակը ինծի ըսաւ. –Ինչո՞ւ զարմացար. քեզի պիտի ըսեմ իմաստը կնոջ եւ զայն կրող գազանին, որ եօթը գլուխ ու տասը եղջիւր ունի։ 8 Գազանը որ տեսար՝ կ՚ապրէր, բայց այլեւս չ՚ապրիր. անիկա անդունդէն պիտի ելլէ՝ իր կորուստին երթալու համար։ Բոլոր անոնք որ երկրի վրայ կ՚ապրին եւ որոնց անունները աշխարհի սկիզբէն ի վեր չէին գրուած կեանքի գիրքին մէջ՝ պիտի զարմանան, տեսնելով գազանը որ կ՚ապրէր, բայց այլեւս չ՚ապրիր, եւ սակայն մօտ է վերստին յայտնուելու։ 9 Հո՛ս է ահա, որ իմաստութիւն ունեցող միտք պէտք է։ Եօթը գլուխները եօթը լեռներ են, որոնց վրայ կինը նստած է։ Անոնք միաժամանակ եօթը թագաւորներ են։ 10 Այս եօթը թագաւորներէն հինգը ինկան, մէկը ներկայիս կ՚ապրի, իսկ միւսը տակաւին չէ եկած։ Երբ գայ, միայն կարճ ժամանակ մը պիտի իշխէ։ 11 Եւ այն գազանը որ կ՚ապրէր, բայց այլեւս չ՚ապրիր, ութերորդ թագաւորն է, որ առաջին եօթէն մէկն է եւ որ իր կորուստին կը դիմէ։ 12 Տասը եղջիւրները որ տեսար, տասը թագաւորներ են, որոնք տակաւին չեն թագաւորեր, բայց իշխանութիւն պիտի ստանան եւ մէկ ժամուան համար թագաւորեն գազանին հետ։ 13 Անոնք միակամ են եւ իրենց զօրութիւնն ու իշխանութիւնը գազանին կու տան։ 14 Անոնք Գառնուկին դէմ պիտի պատերազմին, բայց Գառնուկը պիտի յաղթէ անոնց, որովհետեւ ի՛նքն է տէրերուն Տէրը եւ թագաւորներուն Թագաւորը. իր կողքին պատերազմողները կանչուածներն են, ընտրեալները եւ հաւատարիմները։ 15 Հրեշտակը նաեւ ինծի ըսաւ. –Այս ջուրերը որ կը տեսնես եւ ուր պոռնիկը կը նստի՝ ժողովուրդներն են, բազմութիւնները, ազգերն ու լեզուները։ 16 Եւ գազանին տասը եղջիւրները որ տեսար՝ անոնք պիտի ատեն պոռնիկը, պիտի ամայացնեն զայն ու մերկացնեն, պիտի ուտեն անոր միսերը եւ մնացորդը այրեն կրակով։ 17 Որովհետեւ Աստուած անոնց միտքին մէջ դրաւ՝ որ անոր կամքը կատարեն, այսինքն՝ միակամ ըլլան եւ գազանին տան իրենց թագաւորութիւնը, մինչեւ որ Աստուծոյ խօսքերը իրականանան։ 18 Եւ այն կինը որ տեսար՝ մեծ քաղաքն է, որ երկրի թագաւորներուն վրայ կը թագաւորէ։