1Յետոյ տաճարին մէջէն զօրաւոր ձայն մը լսեցի, որ եօթը հրեշտակներուն կ՚ըսէր. «Գացէք եւ Աստուծոյ բարկութեան եօթը անօթները պարպեցէք երկրի վրայ»։
2Առաջին հրեշտակը գնաց եւ իր անօթին պարունակութիւնը թափեց երկրի վրայ։ Անոնք որոնք գազանին կնիքը ունէին կամ երկրպագած էին անոր արձանին, ծածկուեցան գէշ եւ մորմոքող պալարներով։
3Երկրորդ հրեշտակը իր անօթը պարպեց ծովուն վրայ. ծովուն ջուրը մեռելի մը արիւնին նման լերդացաւ եւ հոն գտնուող բոլոր ապրող արարածները սատկեցան։
4Երրորդ հրեշտակը իր անօթը պարպեց գետերուն եւ ջուրի աղբիւրներուն վրայ, եւ անոնք արիւն դարձան։
5Եւ լսեցի որ ջուրերուն վրայ իշխանութիւն ունեցող հրեշտակը կ՚ըսէր. «Արդար ես դուն, որ ես եւ էիր, դուն՝ Սուրբդ, քանի այսպէս դատաստան ըրիր։
6Որովհետեւ անոնց՝ որոնք Աստուծոյ ընտրեալներուն եւ մարգարէներուն արիւնը թափեցին, խմել տուիր բան մը՝ որուն արժանի են»։
7Յետոյ զոհասեղանէն լսեցի ձայն մը, որ կ՚ըսէր. «Այո՛, ո՜վ ամենակալ Տէր Աստուած, արդար եւ ճշմարիտ են վճիռներդ»։
8Չորրորդ հրեշտակը իր անօթին պարունակութիւնը թափեց արեւուն վրայ. եւ արեւուն արտօնութիւն տրուեցաւ մարդիկը խանձելու։
9Սաստիկ տաք եղաւ եւ մարդիկ այրեցան եւ հայհոյեցին Աստուծոյ, որ իշխանութիւն ունի այս պատուհասներուն վրայ. եւ սակայն չապաշխարեցին եւ փառք չտուին Աստուծոյ։
10Հինգերորդ հրեշտակը իր անօթը պարպեց գազանին գահին վրայ, եւ անոր թագաւորութիւնը խաւար դարձաւ. մարդիկ ցաւէն իրենց լեզուները կը խածնէին,
11իրենց ցաւէն ու վէրքերուն կոտտանքէն կը հայհոյէին երկինքի Աստուծոյն եւ սակայն չապաշխարեցին իրենց գործերէն։
12Վեցերորդ հրեշտակը իր անօթը պարպեց Եփրատ մեծ գետին վրայ, եւ անոր ջուրերը ցամքեցան, որպէսզի արեւելքի թագաւորներուն համար ճամբայ պատրաստուի։
13Եւ տեսայ որ վիշապին բերանէն, գազանին բերանէն եւ սուտ մարգարէին բերանէն գորտերու նմանող անմաքուր երեք ոգիներ կ՚ելլէին։
14Անոնք դիւային ոգիներ էին, որոնք հրաշքներ կը գործէին եւ կ՚երթային երկրի բոլոր թագաւորներուն՝ պատերազմի հաւաքելու զանոնք, ամենակալ Տիրոջ մեծ օրուան համար։ Որովհետեւ այսպէս ըսաւ Տէրը.
15«Ահա ես գողի պէս կու գամ։ Երանի՜ անոնց՝ որոնք արթուն կը մնան եւ իրենց հագուստները կը պահեն, որպէսզի մերկ չշրջին եւ իրենց ամօթոյքը չերեւի»։
16Ապա ոգիները թագաւորները հաւաքեցին տեղ մը, որ Եբրայերէնով Արմագեդոն կը կոչուի։
17Եօթներորդ հրեշտակը իր անօթին պարունակութիւնը թափեց օդին մէջ, եւ երկինքի տաճարէն ու գահէն բարձր ձայն մը եկաւ, որ կ՚ըսէր. «Եղա՛ւ»։
18Եւ ահա փայլատակումներ, ձայներ ու որոտումներ եղան. եւ ա՛յնքան զօրաւոր երկրաշարժ մը՝ որուն նմանը չէր եղած երկրի վրայ մարդուն ստեղծուելէն ի վեր. այդքան զօրաւոր երկրաշարժ չէր պատահած։
19Մեծ քաղաքը երեք մասի բաժնուեցաւ, եւ բոլոր երկիրներու քաղաքները կործանեցան։ Աստուած յիշեց մեծ Բաբելոնը եւ անոր տուաւ իր սաստիկ ցասումի գինիին բաժակէն, որ խմէ։
20Բոլոր կղզիները կորսուեցան եւ լեռները անյայտացան մէջտեղէն։
21Երկինքէն աներեւակայելի մեծութեամբ կարկուտ տեղաց մարդոց վրայ։ Եւ մարդիկ Աստուծոյ հայհոյեցին երկինքէն տեղացող այս կարկուտի պատուհասին համար, քանի ահաւոր եւ սաստիկ էր պատուհասը։