Bible

1 Հաստատ գիտցէք, ան որ ոչխարներուն փարախը դռնէն չի մտներ, այլ ուրիշ տեղէ կը մագլցի, անիկա գող է եւ աւազակ. 2 իսկ ան որ դռնէն կը մտնէ, անիկա ոչխարներուն հովիւն է։ 3 Դռնապանը դուռը կը բանայ անոր եւ ոչխարները իր ձայնին կը հետեւին։ Իրենց անուններով կը կանչէ իր ոչխարները եւ դուրս կը տանի զանոնք։ 4 Եւ երբ իր ոչխարները դուրս կը հանէ՝ ի՛նք կ՚առաջնորդէ, եւ ոչխարները կը հետեւին իրեն, որովհետեւ իր ձայնը կը ճանչնան։ 5 Օտարին չեն հետեւիր. ընդհակառակը, կը փախչին անկէ, որովհետեւ օտարներուն ձայնը չեն ճանչնար։ 6 Յիսուս այս առակը խօսեցաւ անոնց, սակայն անոնք չհասկցան թէ ի՛նչ ըսել կ՚ուզէր իրենց։ 7 Ուստի Յիսուս կրկին ըսաւ անոնց. – Հաստատ գիտցէք, թէ ե՛ս եմ ոչխարներուն դուռը։ 8 Բոլոր անոնք որոնք ինձմէ առաջ եկան, գող էին եւ աւազակ. բայց ոչխարները անոնց չհետեւեցան։ 9 Ե՛ս եմ դուռը։ Ով որ ինձմէ անցնելով ներս մտնէ՝ պիտի փրկուի. պիտի մտնէ եւ ելլէ եւ ճարակ գտնէ։ 10 Գողը կու գայ միայն գողնալու, սպաննելու եւ փճացնելու համար։ Ես եկայ՝ որպէսզի կեանք ունենան, եւ լեցուն կեանք ունենան։ 11 Ե՛ս եմ իրաւ հովիւը։ Իրաւ հովիւը իր կեանքը կու տայ ոչխարներուն համար. 12 մինչ վարձկանը, որ հովիւ չէ եւ որուն չեն պատկանիր ոչխարները, երբ կը տեսնէ որ գայլը կու գայ՝ կը լքէ ոչխարները ու կը փախչի, ձգելով որ գայլը յափշտակէ եւ ցրուէ ոչխարները, 13 որովհետեւ վարձկանը չի մտահոգուիր ոչխարներուն վիճակով։ 14 Ե՛ս եմ իրաւ հովիւը։ Կը ճանչնամ ոչխարներս եւ անոնք ալ զիս կը ճանչնան, 15 այնպէս՝ ինչպէս Հայրը զիս կը ճանչնայ եւ ես՝ Հայրը։ Ես կեանքս կու տամ ոչխարներուս համար։ 16 Տակաւին ուրիշ ոչխարներ ալ ունիմ, որոնք այս փարախէն դուրս են. պարտաւոր եմ զանոնք եւս ներս բերել։ Անոնք ալ ինծի մտիկ պիտի ընեն, եւ պիտի ըլլան մէկ հօտ՝ մէկ հովիւով։ 17 Հայրը զիս կը սիրէ, որովհետեւ կեանքս կու տամ՝ վերստին առնելու համար զայն։ 18 Ոչ ոք կրնայ կեանքս ինձմէ խլել։ Ես իմ կամքովս կեանքս կու տամ։ Իրաւունք ունիմ զայն տալու, ինչպէս նաեւ իրաւունք ունիմ զայն կրկին առնելու։ Ահա այսպէս պատուիրեց Հայրս ինծի։ 19 Դարձեալ երկպառակութիւն ինկաւ Հրեաներուն մէջ՝ այս խօսքերուն պատճառով։ 20 Անոնցմէ շատեր կ՚ըսէին. – Դեւ կայ անոր ներսիդին եւ խենթացած է. ինչո՞ւ մտիկ կ՚ընէք իրեն։ 21 Բայց ուրիշներ ալ կ՚ըսէին. – Ըսած խօսքերը դիւահարի խօսքեր չեն. միթէ դեւը կրնա՞յ կոյրի մը աչքերը բանալ։ 22 Ձմեռ էր. Երուսաղէմի մէջ տաճարին նաւակատիքի տօնակատարութիւնը տեղի կ՚ունենար։ 23 Յիսուս տաճարին Սողոմոնի սիւնագաւիթին մէջ կ՚երթեւեկէր, 24 երբ իր շուրջ հաւաքուեցան Հրեաները եւ հարցուցին. – Մինչեւ ե՞րբ մեր հոգին պիտի հանես. եթէ դուն ես Քրիստոսը՝ յստակ ըսէ մեզի։ 25 Յիսուս պատասխանեց. – Արդէն իսկ ձեզի ըսած եմ, սակայն չէք հաւատար։ Այն գործերը որ Հօրս անունով կը կատարեմ, անոնք իսկ կը վկայեն՝ թէ ով եմ ես։ 26 Բայց դուք չէք հաւատար, որովհետեւ իմ ոչխարներէս չէք։ 27 Ես ոչխարներս կը ճանչնամ. անոնք ձայնս կը լսեն եւ կը հետեւին ինծի, 28 եւ ես անոնց յաւիտենական կեանք կու տամ. անոնք բնաւ պիտի չկորսուին։ Ոչ ոք պիտի կարենայ զանոնք յափշտակել իմ ձեռքէս։ 29 Հայրս այդ ոչխարները ինծի տուաւ, եւ ոչ ոք կրնայ յափշտակել զանոնք իմ Հօրս ձեռքէն, որովհետեւ Հայրս բոլորէն աւելի մեծ է։ 30 Ես եւ Հայրս մէկ ենք։ 31 Հրեաները քարեր առին՝ քարկոծելու համար զինք։ 32 Յիսուս ըսաւ անոնց. – Հօրս կողմէ բազմաթիւ բարի գործեր կատարեցի ձեր ներկայութեան, անոնցմէ ո՞ր մէկուն համար կ՚ուզէք քարկոծել զիս։ 33 Հրեաները պատասխանեցին. – Բարի գործերուդ համար չէ որ կ՚ուզենք քարկոծել քեզ, այլ՝ քու ըրած հայհոյութեանդ համար, որովհետեւ դուն մարդ ես եւ դուն քեզ Աստուած կ՚ընես։ 34 Յիսուս պատասխանեց անոնց. – Չէ՞ որ ձեր Օրէնքին մէջ գրուած է՝ «Ես ըսի թէ աստուածներ էք»։ 35 Ահաւասիկ Աստուած ինք «աստուածներ» կ՚անուանէ այն մարդիկը, որոնց իր խօսքը կ՚ուղղէ։ Եւ Սուրբ գիրքին ըսածը կարելի չէ ջնջել։ 36 Արդ, Հայրը ինք ընտրեց զիս եւ աշխարհ ղրկեց. եւ որովհետեւ ըսի թէ Աստուծոյ Որդին եմ՝ ասո՞ր համար «Կը հայհոյես» կ՚ըսէք։ 37 Եթէ ես իմ Հօրս ուզած գործերը չկատարեմ՝ մի՛ հաւատաք ինծի. 38 իսկ եթէ կը կատարեմ՝ նոյնիսկ եթէ ինծի չէք հաւատար, բայց գործերուս հաւատացէք, որպէսզի գիտնաք ու ճանչնաք թէ Հայրը իմ մէջս է եւ ես՝ Հօրս մէջ։ 39 Դարձեալ ուզեցին բռնել Յիսուսը, բայց անիկա խոյս տուաւ անոնց ձեռքէն։ 40 Ապա կրկին գնաց Յորդանան գետին դիմացի կողմը, հոն՝ ուր Յովհաննէս նախապէս կը գտնուէր եւ կը մկրտէր։ Ու հոն մնաց։ 41 Շատեր եկան իրեն. անոնք կ՚ըսէին. – Յովհաննէս ոեւէ հրաշք չգործեց, 42 բայց ինչ որ ըսաւ այս մարդուն մասին՝ ճիշդ էր։ Եւ հոն շատեր հաւատացին Յիսուսի։