Hebrews 10
1 Մովսիսական Օրէնքըպարզապէսգալիքնորկարգերուն շուքը, այսինքն՝ մօտաւոր նմանութիւնը միայն կը ներկայացնէ եւ ո՛չ թէ անոր հարազատ պատկերը։ Այդ պատճառով ալ՝ նոյն զոհերը տարուէ տարի շարունակ կը մատուցուին, որովհետեւ չեն կրնար կատարելութեան հասցնել այդ զոհերով Աստուծոյ մօտիկ եկողները։
2 Եթէ արդարեւ ի վիճակի ըլլային պաշտամունքը մատուցանողներուն մեղքերը սրբելու, սրբուած այդ մարդիկը այլեւս մեղքերու խղճահարութիւնը պիտի չունենային, եւ զոհերն ալ պիտի դադրէին։
3 Մինչդեռ տարուէ տարի մատուցուող այդ զոհերը պարզապէս կը ծառայեն՝ մարդոցմեղքերը իրենց յիշեցնելու,
4 որովհետեւ ցուլերու եւ նոխազներու արիւնը բնաւ չի կրնար մեղքերը ջնջել։
5 Ահա թէ ինչու, Քրիստոս իր աշխարհ գալուն կապակցաբար՝ կ՚ըսէ Աստուծոյ.– «Զոհ եւ ընծայ չկամեցար, այլ մարմին մը պատրաստեցիր դուն ինծի.
6 ողջակէզներ դուն չուզեցիր, ոչ ալ զոհեր՝ մեղքի համար մատուցուած։
7 Ուստի ըսի.– Ահա կու գամ՝ ճիշդ ինչպէս որ Օրէնքներու գիրքին մէջ ինծի համար գրուած է՝ որպէսզի քու կամքդ ընեմ, ո՛վ Աստուած»։
8 Սկիզբը կ՚ըսէ. «Զոհ եւ ընծայ չկամեցար, ողջակէզներ դուն չուզեցիր, ոչ ալ զոհեր՝ մեղքի համար մատուցուած», հակառակ անոր որ Օրէնքը ինք կը պահանջէ այդ զոհերը մատուցանել։
9 Ապա կ՚աւելցնէ. «Ահա կու գամ՝ որպէսզի քու կամքդ ընեմ, ո՛վ Աստուած»։ Ինչ որ կը նշանակէ՝ թէ Աստուած բոլոր նախկին զոհերը կը վերցնէ եւ անոնց տեղ Քրիստոսի զոհը կը հաստատէ։
10 Եւ որովհետեւ Յիսուս Քրիստոս Աստուծոյ կամքը կատարեց, իր մարմինին անկրկնելի զոհագործումովը մենք սրբուեցանք մեր մեղքերէն։
11 Դարձեալ, ոեւէ քահանայ ամէն օր պաշտամունք կը կատարէ եւ բազմիցս կը մատուցանէ նոյն զոհերը, որոնք երբեք չեն կրնար վերցնել մեղքերը։
12 Մինչդեռ Քրիստոս միայն մէկ զոհ մատուցանեց մեղքերուն համար, եւ մշտնջենապէս «նստաւ Աստուծոյ աջ կողմը».
13 եւ այսուհետեւ կը սպասէ, մինչեւ որ Աստուած իր «թշնամիները իր ոտքերուն տակ դնէ որպէս պատուանդան»։
14 Այսպէս, Քրիստոս միակ պատարագով մը՝ յաւիտենապէս կատարեալ դարձուց մեղքերէ սրբուած մարդիկը։
15 Սուրբ Հոգին եւս նոյն բանին մասին կը վկայէ մեզի։ Որովհետեւ սկիզբը ըսելէ ետք, թէ՝
16 «Հետեւեալն է Ուխտը, որ իրենց հետ պիտի կնքեմ գալիք օրերուն,– կ՚ըսէ Տէրը.– իրենց միտքերուն մէջ պիտի դրոշմեմ իմ օրէնքներս, իրենց սիրտերուն վրայ պիտի գրեմ զանոնք»,
17 ապա շարունակելով՝ կ՚ըսէ. «Ա՛լ պիտի չյիշեմ իրենց մեղքերն ու անօրէնութիւնները»։
18 Արդ, երբ մեղքերն ու անօրէնութիւնները ներուած են, ա՛լ պէտք չկայ անոնց համար ընծայ մատուցանելու։
19 Հետեւաբար, եղբայրնե՛ր, Յիսուսի արիւնով՝ այլեւս ազատ ենք Սրբարան մտնելու,
20 որովհետեւ Յիսուս ինք մեզի համար բացաւ Աստուծոյ հասնելու այդ նոր եւ կենդանի ճամբան՝ վարագոյրէն անդին անցնելով, այսինքն՝ իր մարմինը որպէս զոհ մատուցանելով,
21 եւ ատով իսկ Աստուծոյ ժողովուրդին Քահանայապետը եղաւ։
22 Ուստի անկեղծ սրտով եւ վստահութեամբ լեցուն հաւատքով մօտենանք Աստուծոյ, մեր սիրտերը մաքրած՝ խղճմտանքը ծանրացնող յանցանքներէն եւ մեր մարմինները մաքուր ջուրով լուացած։
23 Անխախտ պահենք այն յոյսը որ կը դաւանինք, վստահ ըլլալով՝ որ Աստուած հաւատարիմ է իր խոստումին։
24 Հոգածու ըլլանք իրարու հանդէպ, սիրոյ եւ բարի գործերու մղելով իրար։
25 Բնաւ չդադրինք պաշտամունքի հաւաքոյթներուն մասնակցելէ, ինչպէս ոմանք սովորութիւն ըրեր են. ընդհակառակը, այդ ուղղութեամբ աւելի եւս յորդորենք իրար, քանի կը տեսնենք թէ Տիրոջ Օրը կը մօտենայ։
26 Որովհետեւճշմարտութիւնը ճանչնալէ եւ ընդունելէ ետք՝ եթէ գիտակցաբար շարունակենք յանցանք գործել, այնուհետեւ ա՛լ չի մնար ոեւէ զոհ որ մեր մեղքերը քաւէ.
27 այլ՝ մեզի կը մնայ միայն ահարկու սպասում մը՝ Աստուծոյ դատաստանին եւ այն բոցավառ կրակին, որ պիտի լափէ Աստուծոյ հակառակորդները։
28 Եթէ Մովսիսական Օրէնքը խախտողը «երկու կամ երեք հոգիի վկայութեամբ մահուան կը դատապարտուի» առանց գթութեան,
29 որքա՜ն աւելի ծանր պատիժի արժանի պիտի համարէք այն անձը՝ որ ոտնակոխ կ՚ընէ Աստուծոյ Որդին, կ՚արհամարհէ Նոր Ուխտի կնքումին համար թափուած արիւնը, որով Քրիստոս զինք սրբեց, եւ կ՚անարգէ շնորհքները պարգեւող Սուրբ Հոգին։
30 Որովհետեւ մենք կը ճանչնանք ան՝ որ կ՚ըսէ. «Ի՛մս է դատելու եւ պատժելու իրաւունքը. ե՛ս պիտի հատուցանեմ,– կ՚ըսէ Տէրը», եւ կ՚աւելցնէ. «Տէրը ինք պիտի դատէ իր ժողովուրդը»։
31 Իրաւ որ սարսափելի բան է կենդանի Աստուծոյ ձեռքը իյնալը։
32 Արդ, յիշեցէք այն առաջին օրերը, երբ դեռ նոր լուսաւորուած՝ բազմաթիւ ծանր չարչարանքներու տոկացիք։
33 Մերթ նախատինքի եւ հալածանքներու առարկայ եղաք հրապարակաւ, մերթ այդ նախատինքն ու հալածանքները կրողներուն կողքին կեցաք։
34 Բանտարկեալներուն չարչարակից եղաք, եւ ձեր ստացուածքներուն յափշտակուիլը ուրախութեամբ ընդունեցիք, գիտնալով որ երկինքի մէջ աւելի լաւ ստացուածքներ ունիք, որոնք մնայուն են։
35 Հետեւաբար մի՛ կորսնցնէք ձեր վստահութիւնը, որովհետեւ անիկա մեծապէս պիտի վարձատրէ ձեզ։
36 Պէտք է համբերել գիտնաք, որպէսզի Աստուծոյ կամքը կատարելով՝ իր խոստումին տիրանաք։
37 Որովհետեւ «Շատ, շատ քիչ ատենէն՝ ան որ գալիք է՝ պիտի գայ, առանց ուշանալու։
38 Այն ատեն,– կ՚ըսէ Տէրը.– Ինծի վստահած արդար մարդը իր հաւատքով պիտի փրկուի. բայց ինձմէ երես դարձնողը նկատի պիտի չառնեմ»։
39 Մենք, սակայն, Աստուծմէ երես դարձնողներէն չենք, որոնք կորուստի սահմանուած են. այլ հաւատքը կը պահենք՝ մեր հոգին փրկելու համար։