Galatians 4
1 Բայց գիտցէ՛ք նաեւ, թէ ժառանգորդ մը թէպէտ ամբողջ ժառանգութեան իսկական տէրն է, բայց որքան ատեն որ անչափահաս է՝ տարբերութիւն չունի ծառայէ մը,
2 քանի խնամակալներու եւ հոգաբարձուներու ենթակայ է, մինչեւ հասնի իր հօրը որոշած ժամանակակէտը։
3 Նոյնն է մեր ալ պարագան։ Որքան ատեն որ հոգեւորապէս անչափահաս էինք՝ բնութեան ոյժերուն կ՚ենթարկուէինք ու կը ծառայէինք։
4 Բայց հիմա յարմար ժամանակը հասած համարելով, Աստուած աշխարհ ղրկեց իր Որդին, որ կնոջմէ մը ծնաւ եւ Օրէնքին տակ ապրեցաւ,
5 որպէսզի մեզ Օրէնքին գերութենէն փրկէ եւ Աստուծոյ որդիներ դարձնէ։
6 Արդ, որովհետեւ իր որդիներն ենք՝ Աստուած մեր սիրտերուն մէջ ղրկեց իր Որդիին Հոգին, որով զԱստուած «Աբբա», այսինքն «Հայր» կը կոչենք։
7 Ուստի այլեւս ծառայ չէք, այլ՝ որդի. եւ քանի որդի էք՝ Աստուծոյ խոստումը պիտի ժառանգէք։
8 Ճիշդ է որ նախապէս երբ զԱստուած չէիք ճանչնար՝ չաստուածներու կը ծառայէիք։
9 Բայց հիմա որ զԱստուած ճանչցանք եւ մանաւանդ Աստուած ալ ձեզ ճանչցաւ, ի՞նչպէս կրկին կը վերադառնաք բնութեան տկար ու խեղճ ոյժերու պաշտամունքին եւ վերստին կ՚ուզէք անոնց ծառայել.
10 յատուկ կարեւորութիւն կու տաք որոշ օրերու եւ ամիսներու, որոշ ժամանակներու կամ տարիներու։
11 Կը վախնամ որ ձեզի համար տարած ամբողջ աշխատանքս զուր անցած ըլլայ։
12 Կը խնդրեմ, եղբայրնե՛ր, ինծի պէս եղէք, քանի ես ալ ժամանակ մը ձեզի պէս էի։
13 Ձեզի դէմ բնաւ գանգատ մը չունիմ։ Ընդհակառակը. հարկաւ գիտէք թէ սկիզբը, երբ Աւետարանը ձեզի քարոզելու եկայ, տկար էի մարմնով.
14 եւ հակառակ անոր որ հիւանդ վիճակովս փորձանք եղայ ձեզի, չանարգեցիք զիս, ո՛չ ալ արհամարհեցիք. այլ զիս ընդունեցիք այնպէս՝ ինչպէս Աստուծոյ հրեշտակը կամ Քրիստոս Յիսուսը պիտի ընդունէիք.
15 եւ ուրախութեամբ ըրիք ատիկա։ Հիմա ի՞նչ պատահեցաւ։ Կրնամ վկայել ձեզի համար, որ եթէ կարելի ըլլար՝ ձեր աչքերը կը հանէիք եւ կու տայիք ինծի։
16 Միթէ ճշմարիտը խօսած ըլլալուս համար թշնամի՞ եղայ ձեզի։
17 Մի՛ կարծէք թէ ձեզի հանդէպ մասնաւոր հետաքրքրութիւն ցուցաբերող այդ մարդիկը ձեր բարիքը կը խորհին։ Ո՛չ։ Անոնք կ՚ուզեն ձեզ ինձմէ բաժնել, որպէսզի ամբողջութեամբ իրենց հետեւիք։
18 Բայց երանի տե՛ւաբար բարիին նախանձախնդիր ըլլայիք, եւ ո՛չ միայն երբ որ ես ձեր մէջ ներկայ եմ։
19 Իմ ձագուկներս էք դուք, բայց ահա դարձեալ մօր մը պէս երկունքի ցաւ կը քաշեմ ձեզի համար, մինչեւ որ Քրիստոսի հարազատ պատկերը դառնաք։
20 Կ՚ուզէի ձեր մօտ ըլլալ հիմա եւ տարբեր ձեւով խօսիլ, որովհետեւ շատ մտահոգ եմ ձեզմով։
21 Ըսէ՛ք տեսնեմ, դուք՝ որ Օրէնքին ենթակայ կ՚ուզէք մնալ, չէ՞ք կարդացած՝ ի՛նչ կ՚ըսէ Օրէնքի գիրքը։
22 Կ՚ըսէ՝ թէ Աբրահամ երկու որդիներ ունեցաւ, մէկը՝ ստրուկ աղախինէն, իսկ միւսը՝ ազատ կնոջմէն։
23 Աղախինէն ծնածը մարդկային մտահոգութիւններէ ծնաւ, մինչդեռ ազատ կնոջմէն ծնածը՝ աստուածային խոստումով։
24 Այս բաները այլաբանօրէն պէտք է հասկնալ։ Երկու կիները երկու Ուխտերը կը ներկայացնեն։ Անոնցմէ մէկը՝ Հագարը, որ ստրուկ զաւակներ ծնաւ, Սինա լերան վրայ կնքուած Ուխտն է։
25 Այո՛, Հագարը Արաբիայի Սինա լեռը կը խորհրդանշէ, եւ կը համապատասխանէ ներկայ Երուսաղէմին, որ իր զաւակներով միասին ստրկութեան մէջ է։
26 Իսկ միւս կինը որ ազատ է՝ կը խորհրդանշէ վերին Երուսաղէմը, որ մեր բոլորին մայրն է։
27 Արդարեւ, մարգարէութեան մէջ գրուած է. -- «Ուրախացի՛ր, ո՛վ ամուլ, որ զաւակ չծնար. ցնծութեամբ երգէ եւ աղաղակէ՛, դուն՝ որ երկունքի ցաւ չճանչցար. որովհետեւ դուն՝ լքուածդ, աւելի շատ զաւակ պիտի ունենաս քան ամուսին ունեցողը»։
28 Արդ, եղբայրներ, Իսահակին պէս՝ մենք ալ խոստումի որդիներ ենք։
29 Եւ ճիշդ ինչպէս այն ատեն մարդկային մտահոգութիւններէն ծնածը կը հալածէր Սուրբ Հոգիին խոստումով ծնածը, այնպէս կ՚ըլլայ նաեւ հիմա։
30 Բայց ի՞նչ կ՚ըսէ Սուրբ գիրքը. «Հեռացո՛ւր այդ աղախինը եւ անոր զաւակը, որովհետեւ աղախինին զաւակը պէտք չէ՛ ժառանգութեան բաժին ստանայ ազատ կնոջ զաւակին հետ միասին»։
31 Արդ, եղբայրնե՛ր, մենք աղախինին զաւակները չենք, այլ՝ ազատին, ա՛յն ազատութեամբ՝ որով Քրիստոս մեզ ազատ ըրաւ։