Galatians 5
1 Ուստիամուր պահեցէքայդ ազատութիւնը, եւ վերստին ստրկութեան լուծին տակ մի՛ մտնէք։
2 Ահա ես՝ Պօղոսս կ՚ըսեմ ձեզի, որ եթէ թլփատուիք՝ Քրիստոս ձեզի օգուտ մը չ՚ունենար։
3 Դարձեալ կը յայտարարեմ, թէ ով որ թլփատուի՝ պարտաւոր է ամբողջ Օրէնքը գործադրելու։
4 Իսկ եթէ փորձէք Օրէնքի գործադրութեամբ արդարանալ՝ ա՛լ Քրիստոսի հետ ձեր կապը կտրած կ՚ըլլաք եւ զրկուած՝ անոր շնորհքէն։
5 Մինչդեռ մենք Սուրբ Հոգիին զօրութեամբ կը սպասենք՝ մեր հաւատքովը արդարանալու յոյսով։
6 Որովհետեւ Քրիստոս Յիսուսի միանալէ ետք՝ ո՛չ թլփատուած ըլլալը արժէք մը ունի, ո՛չ ալ թլփատուած չըլլալը, այլ՝ սիրով գործի դրուած հաւատքը։
7 Լաւ կ՚ընթանայիք. ո՞վ պատճառ եղաւ որ ճշմարտութեան չհնազանդիք։
8 Անշուշտ այդ համոզումը չի գար Աստուծմէ, որ ձեզ կանչեց։
9 Առածը գիտէք, չէ՞. «Քիչ մը թթխմորը ամբողջ զանգուածը կը խմորէ»։
10 Բայց ես Տիրոջմով վստահ եմ՝ որ ինձմէ տարբեր չէք խորհիր դուք ալ. իսկ ձեր միտքը պղտորողը ո՛վ որ ալ ըլլայ՝ իր պատիժը պիտի ստանայ Աստուծմէ։
11 Գալով ինծի, եղբայրնե՛ր, եթէ ես ալ տակաւին թլփատուիլ կը քարոզեմ, ինչպէս ոմանք կ՚ըսեն, ալ ինչո՞ւ կը հալածուիմ. չէ՞ որ այդ պարագային խաչի վրայ Քրիստոսի մահը կը դադրի գայթակղութիւն ըլլալէ։
12 Երանի՜ թէ արմատէն կտրուէին ձեր միտքը պղտորող այդ մարդիկը։
13 Եղբայրնե՛ր, Աստուած ձեզ կանչեց որ ազատ ըլլաք. միայն նայեցէք՝ որ այդ ազատութիւնը մարդկային ցանկութիւններ կատարելու պատրուակ չդառնայ, այլ՝ սիրով ծառայեցէք իրարու։
14 Որովհետեւ Օրէնքը լրիւ գործադրած կ՚ըլլաք սա մէկ պատուիրանով. «Սիրէ՛ ընկերդ քու անձիդ պէս»։
15 Իսկ եթէ այդպէս զիրար վիրաւորէք ու բզկտէք, զգո՜յշ, դուք ձեզ պիտի կործանէք։
16 Հետեւեալը կը թելադրեմ. -- Սուրբ Հոգիով առաջնորդուեցէք, փոխանակ մեղանչական բնութեան յատուկ ցանկութիւնները կատարելու։
17 Որովհետեւ մեղանչական բնութիւնը Սուրբ Հոգիին ցանկացածին հակառակն է որ կը ցանկայ, իսկ Սուրբ Հոգին՝ մեղանչական բնութեան ցանկացածին հակառակը։ Ասոնք իրարու հակառակ են, եւ ա՛յդ է պատճառը որ դուք չէք կրնար ձեր ուզածը կատարել։
18 Արդ, եթէ դուք Սուրբ Հոգիով կ՚առաջնորդուիք՝ կը նշանակէ թէ այլեւս Օրէնքին ենթակայ չէք։
19 Մարդկային գործերը յայտնի են, ինչպէս՝ շնութիւն, պոռնկութիւն, անբարոյութիւն,
20 կռապաշտութիւն, կախարդութիւն, թշնամութիւն, կռիւ, նախանձ, բարկութիւն, հակառակութիւն, երկպառակութիւն, բաժանումներ,
21 չար կամեցողութիւն, սպանութիւն, արբեցութիւն, անառակութիւն, եւ ասոնց նման բաներ։ Եւ կը նախազգուշացնեմ ձեզ, ինչպէս նախապէս ալ ըրած եմ, թէ այսպիսի բաներ ընողները Աստուծոյ արքայութիւնը պիտի չժառանգեն։
22 Իսկ Սուրբ Հոգիին արդիւնքներն են՝ սէր, ուրախութիւն, խաղաղութիւն, համբերատարութիւն, ազնուութիւն, բարութիւն, հաւատարմութիւն,
23 հեզութիւն, ժուժկալութիւն։ Այսպիսի բաներու դէմ ոեւէ օրէնք չկայ։
24 Եւ անոնք որոնք Քրիստոսի կը պատկանին՝ իրենց մարդկային կիրքերն ու ցանկութիւնները խաչին վրայ մահացուցին։
25 Արդ, քանի Սուրբ Հոգիով այս նոր կեանքը կ՚ապրինք, նաեւ Սուրբ Հոգիով առաջնորդուինք։
26 Չըլլանք սնապարծ, չգրգռենք իրար, չնախանձինք իրարու։