Galatians 3
1 Ո՜վ պնմիտ Գպղպտպցիներ, ո՞վձեզհրապուրեց։ Մոռցա՞ք խաչի վրայ Յիսուս Քրիստոսի մահը, որ ես ձեր աչքերուն դիմաց պատկերեցի։
2 Սա՛ միայն կ՚ուզեմ գիտնալ, ըսէ՛ք, Օրէնքի գործադրութեա՞մբ Սուրբ Հոգին ստացաք, թէ Աւետարանի պատգամին հաւատալով։
3 Այդքան անմի՞տէք. Սուրբ Հոգիով նոր կեանք սկսելէ ետք այժմ Օրէնքին պահանջքներո՞ւն կը վերադառնաք։
4 Ձեր ունեցած ամբողջ փորձառութիւնը զո՞ւր անցաւ։ Չեմ խորհիր որ զուր անցաւ։
5 Աստուած ձեզի Սուրբ Հոգին շնորհեց եւ ձեր մէջ հրաշքներ գործեց՝ Օրէ՞նքը գործադրելնուդ համար, թէ Աւետարանի պատգամին հաւատալնուդ համար։
6 Յիշեցէ՛ք Աբրահամի օրինակը։ Սուրբ գիրքը կ՚ըսէ. «Հաւատաց Աստուծոյ, եւ այդ հաւատքին համար ալ Աստուած զինք արդար համարեց»։
7 Գիտցէք, հետեւաբար, թէ հաւատքին ապաւինողներն են Աբրահամի իսկական զաւակները։
8 Սուրբ գիրքին մէջ նախատեսուած էր, որ Աստուած հաւատքով պիտի արդարացնէր բոլոր ազգերը. ուստի կանուխէն խոստում տրուած էր Աբրահամի, թէ՝ «Քեզմով պիտի օրհնուին բոլոր ազգերը»։
9 Այնպէս որ, հաւատքին ապաւինողները կ՚օրհնուին Աբրահամի հետ, որ ի՛նք եւս հաւատքին ապաւինեցաւ։
10 Անոնք որ Օրէնքի գործադրութեան կ՚ապաւինին՝ անէծքի ենթակայ են. որովհետեւ նոյն Օրէնքի գիրքը կ՚ըսէ՝ «Անիծեալ ըլլայ՝ ով որ այս Օրէնքի գիրքին մէջ գրուած բոլոր պատուիրաններուն չի հնազանդիր ու զանոնք չի կատարեր»։
11 Արդ, թէ ոեւէ մէկը Օրէնքի գործադրութեամբ չի կրնար արդարանալ Աստուծոյ առջեւ՝ շատ յստակ է, որովհետեւ մարգարէն կ՚ըսէ. «Արդարը իր հաւատքով պիտի փրկուի»։
12 Մինչդեռ Օրէնքը կախում չունի հաւատքէն, այլ, ինչպէս Սուրբ գիրքը կ՚ըսէ՝ «Ով որ կանոնները կատարէ՝ անոնցմով պիտի փրկուի»։
13 Քրիստոս Օրէնքի այդ անէծքէն մեզ ազատեց, ինք մեր տեղը անէծքի առարկայ դառնալով. որովհետեւ Օրէնքի գիրքին մէջ գրուած է. «Անիծեալ է ան՝ որ փայտէ կը կախուի»։
14 Քրիստոս խաչին վրայ կախուեցաւ՝ որպէսզի բոլոր ազգերը Աբրահամի խոստացուած օրհնութիւնը ունենան Քրիստոս Յիսուսով, եւ մենք անոր հաւատալով՝ խոստացուած Սուրբ Հոգին ստանանք։
15 Եղբայրնե՛ր, մարդկային սովորական հասկացողութիւն է՝ որ մարդու մը կատարած կտակը ուրիշ ոեւէ մէկը չի կրնար ջնջել, ո՛չ ալ փոփոխութեան ենթարկել։
16 Արդ, Աստուած խոստումներ տուաւ Աբրահամի եւ անոր զաւակին։ Սուրբ գիրքը չ՚ըսեր՝ «Եւ անոր զաւակներուն», որ բազմաթիւ անձերու ակնարկութիւն պիտի ըլլար, այլ եզակի ձեւով կ՚ըսէ՝ «Եւ քու զաւակիդ»։ Իսկ այդ զաւակը Քրիստոս է։
17 Վերադառնալով կտակին, հետեւեալը կ՚ուզեմ ըսել.– Կտակը որ Աստուած կատարեց՝ Քրիստոսը նկատի ունենալով՝ շատ աւելի կանուխ է քան Օրէնքը, որ չորս հարիւր երեսուն տարիներ ետք տրուեցաւ. եւ ուստի, Օրէնքը անվաւեր չի դարձներ կտակը եւ չի ջնջեր խոստումը։
18 Որովհետեւ, եթէ ժառանգուելիք օրհնութիւնը Օրէնքին կապուած ըլլար՝ ա՛լ կախում պիտի չունենար խոստումէն. մինչդեռ Աստուած խոստումով էր որ Աբրահամին շնորհեց ժառանգուելիք օրհնութիւնը։
19 Հապա ինչո՞ւ Օրէնքը տրուեցաւ։ Տրուեցաւ՝ որպէսզի մարդիկ իրենց յանցանքները ճանչնան, մինչեւ Աբրահամի զաւակին՝ այսինքն Քրիստոսի գալը, որուն ուղղուած էր խոստումը։ Եւ Օրէնքը տրուեցաւ հրեշտակներու ձեռքով եւ մարդու մը միջնորդութեամբ։
20 Մինչդեռ կտակի պարագային միջնորդի պէտք չկար, որովհետեւ կտակը մէկ հոգիի կողմէ կը կատարուի, եւ այդ մէկը Աստուած էր։
21 Արդեօք ատիկա կը նշանակէ՝ թէ Օրէնքը Աստուծոյ խոստումներուն հակառա՞կ է։ Բնա՛ւ երբեք։ Որովհետեւ, եթէ տրուած ըլլար Օրէնք մը որ ճշմարիտ կեանքը տալու կարող ըլլար՝ ապա հաստատապէս կարելի պիտի ըլլար Օրէնքի գործադրութեամբ արդարանալ։
22 Մինչդեռ Սուրբ գիրքը ցոյց կու տայ, որ ամբողջ աշխարհը ենթակայ է մեղքին, որպէսզի Աստուծոյ օրհնութիւնը ժառանգելու խոստումը հիմնուի Յիսուս Քրիստոսի հաւատքին վրայ եւ տրուի անոնց՝ որոնք կը հաւատան։
23 Որքան ատեն որ հաւատքի ժամանակը եկած չէր՝ Օրէնքը մեզ բանտարկեալներու պէս իր հսկողութեան տակ կը պահէր, սպասելով գալիք հաւատքին՝ Քրիստոսի, որ պիտի յայտնուէր ։
24 Ուրեմն Օրէնքը մեր խնամակալ դաստիարակը եղաւ, մեզ Քրիստոսի առաջնորդելով, որպէսզի հաւատքով արդարանանք։
25 Բայց հիմա որ հաւատքը եկաւ, այլեւս դաստիարակի պէտք չունինք,
26 որովհետեւ Յիսուս Քրիստոսի հաւատալով՝ բոլորդ ալ Աստուծոյ որդիներ եղաք։
27 Անգամ մը որ Քրիստոսի միանալով մկրտուեցաք, այլեւս Քրիստոս է որ կ՚ապրի ձեր մէջ։
28 Ալ ո՛չ Հրեայի եւ հեթանոսի խտրութիւն կայ, ո՛չ ստրուկի եւ ազատ մարդու, ո՛չ ալ արուի եւ էգի, որովհետեւ Քրիստոսի միանալով՝ բոլորդ ալ մէկ եղաք։
29 Արդ ուրեմն, եթէ Քրիստոսի կը պատկանիք՝ կը նշանակէ թէ դուք Աբրահամի զաւակներ էք եւ պիտի ժառանգէք ինչ որ Աստուած անոր խոստացաւ։