Romans 5— DHNT

¹לכן אחרי נצדקנו באמונה שלום לנו עם־האלהים באדנינו ישוע המשיח׃

²אשר בידו מצאנו באמונה מבוא אל־החסד הזה אשר אנחנו עמדים בו ונתהלל בתקות כבוד האלהים׃

³ולא־זאת בלבד כי אף־נתהלל בצרות יען אשר ידענו כי־הצרה מביאה לידי סבלנות׃

⁴והסבלנות לידי עמידה בנסיון והעמידה בנסיון לידי תקוה׃

⁵והתקוה היא לא תביש כי הוצקה בלבבנו אהבת אל על־ידי רוח הקדש הנתן לנו׃

⁶כי המשיח בעודנו חלשים מת בעתו בעד הרשעים׃

⁷הן בעד הצדיק יקשה לאיש למות אכן למות בעד הטוב אולי ישאהו לבו׃

⁸אבל בזאת הודיע האלהים את־אהבתו אלינו כי המשיח מת בעדנו בהיותנו עוד חטאים׃

⁹ועתה אשר נצדקנו בדמו מה־מאד נושע בו מן־הקצף׃

¹⁰כי אם־נרצינו לאלהים במות בנו בהיותנו איבים אף כי־נושע עתה בחייו אחרי אשר נרצינו׃

¹¹ולא־זאת בלבד כי גם־מתהללים אנחנו באלהים על־יד אדנינו ישוע המשיח אשר בו עתה קבלנו את־הרצוי׃

¹²לכן כאשר על־ידי אדם אחד בא החטא לעולם והמות בעקב החטא וכן עבר המות על־כל־בני אדם מפני אשר כלם חטאו׃

¹³כי עד־זמן התורה היה החטא בעולם אך לא־יחשב חטא באין תורה׃

¹⁴אולם המות מלך מאדם עד־משה גם על־אלה אשר לא חטאו בדמיון עברת אדם הראשון אשר־הוא דמות העתיד לבוא׃

¹⁵אך לא כדבר־הפשע דבר המתנה כי אם־בפשע האחד מתו הרבים אף כי־חסד אלהים ומתנתו עדפו עדוף לרבים בחסד האדם האחד ישוע המשיח׃

¹⁶ולא כמו על־ידי חטא אחד כן המתנה כי המשפט יצא מאחד לחיב אבל מתנת החסד היא לזכות מפשעים רבים׃

¹⁷כי אם־בפשע האחד מלך המות על־ידי האחד אף כי־מקבלי עדף החסד ומתנת הצדקה ימלכו בחיים על־ידי האחד ישוע המשיח׃

¹⁸לכן כאשר בפשע אחד נאשמו כל־בני־אדם ככה גם־על־ידי זכות אחת יזכו כל־בני־אדם לחיים׃

¹⁹כי כאשר במרי האדם האחד היו הרבים לחטאים ככה גם על־ידי משמעת האחד יהיו הרבים לצדיקים׃

²⁰אבל התורה נכנסה למען ירבה הפשע ובאשר רבה החטא עדף ממנו החסד׃

²¹למען כאשר מלך החטא במות ככה ימלך גם־החסד על־ידי הצדקה לחיי עולם בישוע המשיח אדנינו׃