Romans 3— DHNT

¹ועתה מה־הוא יתרון היהודי ומה־היא תועלת המילה׃

²הרבה מכל־פנים בראשון כי־הפקדו בידם דברי אלהים׃

³כי מה־הוא אם־מקצתם לא האמינו היבטל חסרון אמונתם את־אמונת אלהים׃

⁴חלילה אבל יהי האל הוא הנאמן וכל־האדם כזב ככתוב למען־תצדק בדברך תזכה בשפטך׃

⁵ואם־עולתנו תרומם את־צדקת האלהים מה־נאמר הכי יש־עול באלהים המשלח חרון אפו לפי דרך בני־אדם אנכי מדבר׃

⁶חלילה שאם־כן איך־ישפט האלהים את־העולם׃

⁷כי אם־על־ידי כזבי תרבה ותפרץ אמת אלהים לתהלתו למה זה אני אשפט עוד כחוטא׃

⁸ולא נעשה כדבר מחרפינו ומקצת מוציאי דבה עלינו לאמר הנה אמרים נעשה הרע למען יצא הטוב אשר דינם יבא עליהם בצדק׃

⁹ועתה מה־הוא היש־לנו מעלה יתרה לא במאומה כבר הוכחנו כי גם־היהודים גם־היונים כלם הם תחת החטא׃

¹⁰ככתוב אין צדיק אין גם־אחד׃

¹¹אין משכיל אין־דרש את־אלהים׃

¹²הכל סר יחדו נאלחו אין עשה־טוב אין גם־אחד׃

¹³קבר פתוח גרונם לשונם יחליקון חמת עכשוב תחת שפתימו׃

¹⁴אשר אלה פיהם מלא ומררות׃

¹⁵רגליהם ימהרו לשפך־דם׃

¹⁶שד ושבר במסלתם׃

¹⁷ודרך שלום לא ידעו׃

¹⁸אין־פחד אלהים לנגד עיניהם׃

¹⁹ואנחנו ידענו כי כל־מה־שאמרה התורה מדברת אל־אלה אשר תחת התורה למען יסכר כל־פה והיה כל־העולם מחיב לפני אלהים׃

²⁰יען אשר ממעשי התורה לא־יצדק לפניו כל־בשר כי על־ידי התורה דעת החטא׃

²¹ועתה בבלי תורה צדקת אלהים לאור יצאה אשר העידו עליה התורה והנביאים׃

²²והיא צדקת אלהים באמונת ישוע המשיח אל־כל ועל־כל אשר האמינו בו כי אין הבדל׃

²³כי־כלם חטאו וחסרי־כבוד אלהים המה׃

²⁴ונצדקו חנם בחסדו על־ידי הפדות אשר היתה במשיח ישוע׃

²⁵אשר שמו האלהים לפנינו לכפרת על־ידי האמונה בדמו להראות את־צדקתו אחרי אשר־העביר את־החטאים שנעשו לפנים בעת חמלת אלהים׃

²⁶להראות את־צדקתו בעת הזאת להיותו צדיק ומצדיק את־בן־אמונת ישוע׃

²⁷ועתה איה ההתהללות הלא נשבתה ועל־ידי תורת־מה העל־ידי־תורת המעשים לא כי על־ידי תורת האמונה׃

²⁸לכן נחשב כי באמונה יצדק האדם בבלי מעשי תורה׃

²⁹או האלהים רק אלהי היהודים הלא גם אלהי הגוים אכן גם־אלהי הגוים הוא׃

³⁰כי אחד האלהים המצדיק את־המולים מתוך האמונה ואת־הערלים על־ידי האמונה׃

³¹ועתה המבטלים אנחנו את־התורה על־ידי האמונה חלילה אך מקימים אנחנו את־התורה׃