Psalms 89— NLV

¹***

²Ek wil altyd sing van die goedheid van die Here. Ek wil, geslag na geslag, sy getrouheid bekendmaak.

³Ek het gesê: “U troue liefde sal vir altyd duur. U getrouheid is so standvastig soos die hemel.”

⁴U het gesê: “Ek het ’n verbond gesluit met my uitverkorene. Ek het ’n eed afgelê vir Dawid, my dienaar:

⁵‘Ek sal jou nageslag vir altyd as konings vestig, en jou troon bou van geslag tot geslag.’” Sela

⁶Here, die hemel prys u wondermag; die hemelse wesens prys u trou.

⁷Want wie in die hemel kan met die Here vergelyk word? Wie onder die hemelse wesens is soos die Here?

⁸In die hemelse vergadering is daar groot ontsag vir God. Hy is meer ontsagwekkend as hulle wat Hom omring.

⁹Here, God die Almagtige, wie is magtig soos U, Here? U is omring deur u getrouheid.

¹⁰U heers oor die bruisende oseane. As die golwe styg, laat U dit bedaar.

¹¹U het vir Rahab vernietig, met u sterke arm u vyande verdryf.

¹²Aan U behoort die hemel, die aarde is u besitting, die wêreld en alles daarin — dit alles het U gemaak.

¹³U het noord en suid gemaak, Tabor en Hermon prys u Naam.

¹⁴U arm is toegerus met mag, u hand is sterk, u regterhand is omhoog!

¹⁵Geregtigheid en reg is die fondament van u troon. Onfeilbare trou en waarheid is tot u diens.

¹⁶Geseënd is hulle wat U met vreugde dien, wat lewe in die lig van u teenwoordigheid, Here.

¹⁷Hulle juig die hele dag oor u Naam, is verheug oor u regverdigheid.

¹⁸U is hulle kragtige roem. Deur u goedheid is ons sterk.

¹⁹Die Here is ons beskermer, die Heilige van Israel is ons koning.

²⁰Voorheen het U deur ’n visioen met hulle wat aan U getrou is, gepraat en gesê: “Ek het hulp verleen aan ’n krygsman. Uit die gewone mense het Ek die uitverkore een verhef.

²¹Ek het my dienskneg Dawid gevind. Met heilige olie het Ek hom gesalf.

²²Met my hand sal Ek hom ondersteun, met my arm sal Ek hom sterk maak.

²³Vyande sal hom nie onderwerp nie, goddeloses sal hom nie verdruk nie.

²⁴Ek sal sy vyande voor hom verpletter en sy haters verslaan.

²⁵My trou en liefde sal met hom wees, en deur my Naam sal hy oorwin.

²⁶Ek sal sy mag uitbrei tot by die see, en tot by die riviere.

²⁷Hy sal vir My sê: ‘U is my Vader, my God, die rots van my redding.’

²⁸Ek sal hom my eersgeborene maak, die magtigste koning op aarde.

²⁹Ek sal vir altyd aan hom my trou betoon; my verbond met hom vas laat staan.

³⁰Ek sal ’n opvolger vir altyd bepaal; sy troon sal wees sonder einde, so lank as wat die hemel bestaan.

³¹Maar as sy seuns my gebooie nalaat en nie in my weë wandel nie,

³²as hulle nie my bepalings navolg, nie my bevele gehoorsaam nie,

³³dan sal Ek hulle eiesinnigheid straf, hulle oortredings swaar bestraf.

³⁴Maar my liefde vir hom sal nooit ophou nie, en my trou aan hom sal Ek nie wegneem nie.

³⁵Ek sal my verbond nie verbreek nie, en wat Ek beloof het, nie verander nie.

³⁶Ek het by my heiligheid ’n eed afgelê, en my belofte aan Dawid sal Ek nie verbreek nie.

³⁷Sy nakomelinge sal altyd daar wees, en sy troon sal blywend wees soos die son.

³⁸Soos die maan is dit daar vir altyd, ’n getroue getuie in die lug!” Sela

³⁹Maar U het hom verwerp en verstoot. U was kwaad vir u gesalfde.

⁴⁰U het u verbond met hom laat vaar, U het sy kroon op die grond vertrap.

⁴¹U het al sy stadsmure afgebreek en sy vestings in puinhope verander.

⁴²Elkeen wat verbykom, beroof hom, terwyl sy bure hom bespot.

⁴³U het sy vyande laat triomfeer, al sy teenstanders laat jubel.

⁴⁴U het sy swaard nutteloos gemaak, hom nie bygestaan in die geveg nie.

⁴⁵U het sy grootsheid beëindig en sy troon op die grond gegooi.

⁴⁶U het hom oud voor sy tyd gemaak en hom met vernedering oordek. Sela

⁴⁷Hoe lank nog, Here? Sal U Uself vir altyd verberg, en u toorn soos vuur laat brand?

⁴⁸Dink tog hoe verganklik is die lewe. Is die skepping van die mens dan ’n nuttelose daad?

⁴⁹Watter mens kan lewe sonder om die dood te sien? Wie kan homself red uit die mag van die doderyk? Sela

⁵⁰Here, waar is u liefde van vroeër wat U in u trou met ’n eed aan Dawid beloof het?

⁵¹Dink tog, Here, aan die vernedering van u dienaars, hoe ek in my hart die beledigings van baie volke dra.

⁵²Hulle wat spot, is u vyande, Here, hulle bespot elke tree van u gesalfde.

⁵³Lof aan die Here vir altyd! Amen, ja, amen!