Psalms 83— NLV

¹***

²Moenie onverskillig toekyk nie, o God. Moenie stilbly en niks doen nie, o God!

³Luister na die rumoer van u vyande! U haters het hulle teen U verset.

⁴Hulle smee komplotte teen u volk, hulle maak planne teen hulle vir wie U beskerm.

⁵“Kom,” sê hulle. “Laat ons hulle as nasie uitwis sodat die naam van Israel nie meer onthou sal word nie.”

⁶Hulle het eenparig saamgespan, en ’n verdrag teen U gesluit:

⁷Dit is die Edomiete en Ismaeliete, Moabiete en Hagareërs,

⁸Gebal, Ammon en Amalek, Filistea en die inwoners van Tirus.

⁹Selfs Assirië het by hulle aangesluit as bondgenote van die nasate van Lot. Sela

¹⁰Maak met hulle soos met Midian, soos U met Sisera en Jabin by Kisonspruit gedoen het.

¹¹By En-Dor is hulle vernietig, en het bemesting vir die grond geword.

¹²Maak hulle leiers soos Oreb en Seëb, en al hulle aanvoerders soos Seba en Salmunna.

¹³Hulle het gesê: “Kom ons vat dit vir ons, hierdie land van God!”

¹⁴My God, maak hulle soos ’n tolbos, soos kaf voor die wind.

¹⁵Soos vuur ’n woud verteer, soos ’n vlam berge aan die brand steek,

¹⁶agtervolg hulle só met u orkaan, verskrik hulle met u stormwind.

¹⁷Maak hulle tot skande, Here, sodat hulle u Naam sal eer.

¹⁸Laat hulle altyd beskaamd en verskrik wees. Laat hulle verward wees en vergaan

¹⁹sodat hulle kan weet net u Naam is die Here, die Allerhoogste, oor die hele aarde.