Psalms 37— NLV

¹Moenie jou vererg oor boosdoeners nie. Moenie die kwaaddoeners beny nie.

²Want soos gras verlep hulle gou. Soos plante verdroog hulle vinnig.

³Vertrou op die Here en doen wat goed is. Woon in die land en geniet veiligheid.

⁴Wees bly in die Here, en Hy sal jou hartsbegeertes aan jou gee.

⁵Vertrou jou lewe toe aan die Here. Vertrou Hom, en Hy sal vir jou sorg.

⁶Hy sal jou onskuld laat deurbreek soos die lig, en die regverdigheid van jou saak soos die middagson.

⁷Wees stil in die Here, en wag geduldig op Hom. Moenie die mens beny wat op sý manier floreer, of jou verknies oor sy bose planne nie.

⁸Moenie kwaad word nie; laat staan liewer jou woede. Moenie ander beny nie; dit lei net tot jou nadeel.

⁹Want die bose mense sal vernietig word, maar dié wat op die Here vertrou, sal die land besit.

¹⁰Binnekort sal die boosdoeners nie meer daar wees nie; al soek jy na hulle, sal jy hulle nie kry nie.

¹¹Maar sagmoediges sal die land besit, hulle sal oorvloedige vrede geniet.

¹²Die goddelose sweer saam teen die regverdiges en kners op die tande vir hulle.

¹³Maar die Here lag vir hom, want Hy sien sy dag van oordeel kom al nader.

¹⁴Die goddelose trek die swaard en span die boog om die armes en behoeftiges tot ’n val te bring, om hulle wat reg doen, dood te maak.

¹⁵Maar hulle swaard sal hulle eie hart deurboor en hulle boog sal stukkend gebreek word.

¹⁶Dit is beter om vroom te wees en min te besit as om boos te wees en baie besittings te hê.

¹⁷Want die mag van die bose sal verpletter word, maar die Here sal die regverdiges beskerm.

¹⁸Die Here ken die lewensdae van die opregtes, en hulle erfdeel sal vir altyd bly bestaan.

¹⁹In slegte tye sal hulle nie verleë wees nie; selfs in hongersnood sal hulle genoeg hê.

²⁰Maar die goddelose sal vergaan. Die vyande van die Here sal wees soos mooi weivelde wat soos rook verdwyn.

²¹Die goddelose leen en betaal nie terug nie, maar die regverdige gee vrygewig.

²²Hulle vir wie die Here seën, sal die land besit, maar hulle wat Hy vervloek, sal uitgeroei word.

²³Die Here bepaal die rigting van ’n mens met wie se lewe Hy tevrede is.

²⁴Al sou so een struikel, hy sal nie val nie, want die Here hou sy hand vas.

²⁵Ek was jonk, en nou is ek oud. Maar ’n regverdige mens wat verlate is, het ek nooit gesien nie, of dat sy kinders vir kos moes bedel nie.

²⁶Hy leen altyd ruimskoots aan ander, en sy kinders is tot ’n seën.

²⁷Vermy die kwaad en doen wat goed is, dan sal jy vir altyd woon in die land.

²⁸Want die Here het die reg lief, en sal sy getroue dienaars nie verlaat nie. Hy sal hulle vir altyd veilig bewaar, maar die goddelose se kinders sal vergaan.

²⁹Die regverdiges sal die land besit en daar vir altyd woon.

³⁰Die regverdige het wyse raad; wat hy sê, is regverdig.

³¹Die gebooie van sy God is in sy hart. Hy sal nie ’n voet verkeerd sit nie.

³²Die goddelose wag die regverdige in, en wag vir die kans om hom dood te maak.

³³Maar die Here verhoed dat hy in hulle mag val sodat hulle hom skuldig kan bevind wanneer hy voor die gereg kom.

³⁴Vertrou die Here en volg sy voorskrifte. Hy sal jou ophef sodat jy die land sal besit en die goddelose se uitwissing sal sien.

³⁵Ekself het dit sien gebeur: Hoogmoedige en bose mense floreer soos welige bome.

³⁶Maar toe ek weer kyk, was hulle weg! Hoewel ek hulle gesoek het, kon ek hulle nie kry nie!

³⁷Maar kyk na hulle wat eerlik en opreg is, want die toekoms van so ’n mens is vol vrede.

³⁸Maar oortreders word saam vernietig; hulle toekoms sal tot ’n einde kom.

³⁹Die Here red die regverdiges; Hy is ’n toevlug in moeilike tye.

⁴⁰Die Here help hulle, en red hulle van goddelose mense. Hy red hulle, want hulle skuil by Hom.