Psalms 119— NLV

¹Geseënd is hulle wat opreg lewe, wat leef volgens die gebooie van die Here.

²Geseënd is hulle wat sy waarskuwings gehoorsaam, Hom met volle oorgawe dien,

³nie onreg pleeg nie en op sy paaie wandel.

⁴U het ons opdrag gegee om u bevele noukeurig te onderhou.

⁵Mag my optrede voortdurend weerspieël dat ek u voorskrifte wil nakom.

⁶Dan sal ek nie tot skande kom as ek maar net my oë op al u gebooie hou nie.

⁷Wanneer ek u regverdige bepalings bestudeer, wil ek U dank met ’n opregte hart.

⁸U voorskrifte sal ek nakom; moet my net nie verlaat nie!

⁹Hoe kan ’n jongmens ’n skoon lewe lei? Deur sy lewe in te rig volgens u woord.

¹⁰Met my hele hart soek ek U; moenie dat ek afdwaal van u gebooie nie.

¹¹Ek het u woord in my hart gebêre sodat ek nie teen U sou sondig nie.

¹²Geseënd is U, o Here; leer my u voorskrifte.

¹³Die bepalings van u mond het ek met my lippe bekendgemaak.

¹⁴In u voorwaardes het ek my verlustig soos ’n mens bly is oor rykdom.

¹⁵Ek wil oor u bevele nadink en let op u weë.

¹⁶Ek sal my verbly in u voorskrifte en u woord nie vergeet nie.

¹⁷Wees goed vir u dienaar sodat ek mag lewe en u woord gehoorsaam.

¹⁸Maak oop my oë sodat ek die wonders kan sien wat opgeskryf is in u gebooie.

¹⁹Al is ek net ’n vreemdeling op aarde, moenie u gebooie van my weghou nie.

²⁰Ek word voortdurend verteer deur ’n begeerte na u bepalings.

²¹U bestraf trotsaards en vervloektes wat afdwaal van u gebooie.

²²Weer smaad en belediging van my, want ek gehoorsaam u waarskuwings.

²³Al sit en praat heersers saam teen my, sal ek u voorskrifte oordink.

²⁴U waarskuwings is beslis my vreugde; dit gee my goeie raad.

²⁵Ek lê in die stof, op pad na die graf; laat my herlewe volgens u woord.

²⁶My optrede het ek bekendgemaak, en U het geantwoord. Leer my nou u voorskrifte.

²⁷Leer my verstaan die betekenis van u bevele, sodat ek u wonders kan oordink.

²⁸Ek huil van droefheid; versterk my soos U in u woord beloof.

²⁹Bewaar my van leuenagtige weë; leer my in genade u gebooie.

³⁰Ek het die betroubare pad gekies; ek lewe volgens u bepalings.

³¹Ek hou vas aan u voorwaardes, Here. Moenie dat ek in skande kom nie!

³²Ek sal die pad van u gebooie navolg, want U sal my begrip verbreed.

³³Leer my, Here, hoe om u voorskrifte uit te voer sodat ek hulle tot die einde toe kan nakom.

³⁴Gee vir my insig dat ek kan leef volgens u gebooie, en dit van harte gehoorsaam.

³⁵Laat my wandel volgens u gebooie, want dis waarin ek vreugde vind.

³⁶Laat my verlang na wat U vereis; verhoed dat ek materialisties word.

³⁷Weerhou my van waardelose dinge; laat my lewe volgens u voorskrifte.

³⁸Bevestig opnuut aan my u belofte, wat bedoel is vir hulle wat U dien.

³⁹Neem weg die smaad wat ek vrees, want u bepalings is goed.

⁴⁰Ek verlang van harte na u bevele. Laat my lewe deur u geregtigheid.

⁴¹Here, laat u troue liefde my oordek, die redding wat U my belowe het.

⁴²Dan kan ek my spotters antwoord, want ek vertrou op u woord.

⁴³Laat ek tog altyd die waarheid praat, want ek hoop op u geregtigheid.

⁴⁴Ek sal u gebooie gehoorsaam so lank as wat ek lewe.

⁴⁵Ek sal in vryheid kan lewe, want ek soek u bevele.

⁴⁶Voor konings sal ek praat oor u verordeninge, sonder om skaam te wees.

⁴⁷Ek verlustig my in u gebooie wat ek baie liefhet.

⁴⁸Met eerbied lig ek my hande op vir u gebooie wat ek liefhet. Ek dink na oor u voorskrifte.

⁴⁹Onthou die beloftes aan u dienaar, want U het my laat hoop.

⁵⁰U belofte laat my weer lewe, dit vertroos my in al my ellende.

⁵¹Die hoogmoediges minag my op groot skaal; tog wyk ek nie af van u gebooie nie.

⁵²Ek onthou u bepalings van ouds; dit vertroos my, Here.

⁵³Ek is baie ontsteld oor die goddeloses, hulle wat u gebooie verwerp.

⁵⁴U voorskrifte is vir my ’n lied tydens my aardse vreemdelingskap.

⁵⁵In die nag dink ek aan U, Here, en sal u gebooie gehoorsaam.

⁵⁶Dit is soos ek gedoen het, want ek het u bepalings gehoorsaam.

⁵⁷Here, ek behoort aan U! Ek sê ek wil u woord gehoorsaam.

⁵⁸Met my hele hart soek ek U. Wees genadig soos U beloof het.

⁵⁹Ek het my lewenspad oordink en het teruggedraai om volgens u voorwaardes te lewe.

⁶⁰Ek wil gou maak en sonder versuim u gebooie gehoorsaam.

⁶¹Bande van bose mense verstrik my, maar ek vergeet nie u gebooie nie.

⁶²Middernag staan ek op om U te dank vir u regverdige bepalings.

⁶³Ek is ’n vriend vir almal wat U dien, vir elkeen wat u bevele gehoorsaam.

⁶⁴Here, die aarde is vol van u trou; leer my tog u voorskrifte.

⁶⁵U het aan my goedgedoen, Here, net soos U belowe het.

⁶⁶Leer my goeie oordeel en kennis, want ek vertrou op u gebooie.

⁶⁷Voor ek gely het, het ek telkens afgedwaal, maar nou leef ek volgens u woord.

⁶⁸U is goed en doen net wat goed is; leer my u voorskrifte.

⁶⁹Verwaande mense het leuens oor my verkondig, maar ek sal u bevele met my hele hart uitleef.

⁷⁰Hulle harte is afgestomp en koud, maar ek verlustig my in u gebooie.

⁷¹Die lyding was goed vir my, want toe het ek u voorskrifte geleer.

⁷²Die gebooie uit u mond is vir my meer waardevol as baie goud en silwer.

⁷³U hande het my gemaak, my gevorm. Gee my tog insig om u gebooie te verstaan.

⁷⁴U dienaars sal my sien en bly wees, want op u woord hoop ek.

⁷⁵Ek weet, Here, u bepalings is reg; op grond van u trou bestraf U my.

⁷⁶Laat u troue liefde my nou vertroos soos U aan u dienaar beloof het.

⁷⁷Laat u medelye my oordek sodat ek kan lewe, want u gebooie is my vreugde.

⁷⁸Laat die verwaandes in skande kom omdat hulle my vals beskuldig; maar ek sal u bevele oordink.

⁷⁹Laat u dienaars terugkom na my toe, hulle wat u voorskrifte ken.

⁸⁰Mag ek onberispelik wees in die uitleef van u gebooie; dan hoef ek nooit beskaam te wees nie.

⁸¹Ek verlang na u redding; ek vertrou op u woord.

⁸²Ek ooreis my oë om te sien wanneer u beloftes waar word, en vra: “Wanneer sal U my vertroos?”

⁸³Ek het verskrompel soos ’n wynsak in rook, maar ek vergeet nie u voorskrifte nie.

⁸⁴Hoe lank moet u dienaar wag? Wanneer straf U my agtervolgers?

⁸⁵Hierdie verwaande mense wat nie leef volgens u gebooie nie, het vir my vanggate gegrawe.

⁸⁶Al u gebooie is betroubaar. Help my, want hulle vervolg my sonder rede.

⁸⁷Hulle het my byna van die aarde af laat verdwyn, maar ek het geweier om af te sien van u bevele.

⁸⁸Op grond van u troue liefde, spaar tog my lewe sodat ek kan voortgaan om u waarskuwings te gehoorsaam.

⁸⁹U woord, Here, is vir altyd, dit staan vas in die hemel.

⁹⁰U trou is vir geslag na geslag, U het die aarde gevestig, en dit staan nog vas.

⁹¹U bepalings is vandag nog waar, want al hierdie dinge is u dienaars.

⁹²As u gebooie nie vir my vreugde was nie, sou ek gesterf het van ellende.

⁹³Ek sal u bevele nooit vergeet nie, want daardeur gee U my die lewe.

⁹⁴Ek behoort aan U; red my tog! Want ek vra na u bevele.

⁹⁵Bose mense wag my in om my dood te maak, maar ek neem u waarskuwings in ag.

⁹⁶Selfs volmaaktheid het sy perke, maar u gebooie ken geen grense nie.

⁹⁷Hoe lief het ek u gebooie! Ek oordink dit die hele dag.

⁹⁸U gebooie gee my meer insig as wat my vyande het, want dit is gedurig by my.

⁹⁹Ek het meer insig as my leermeesters, want ek oordink u waarskuwings.

¹⁰⁰Ek het meer begrip as ouer mense, want ek lewe volgens u bevele.

¹⁰¹Verkeerde paaie het ek vermy, sodat ek u woord kan gehoorsaam.

¹⁰²Ek het nie afgewyk van u bepalings nie, want U het my dit geleer.

¹⁰³Hoe aangenaam is u woorde vir my; dis soeter as heuning in my mond.

¹⁰⁴Deur u bevele kry ek insig; daarom haat ek elke valse pad.

¹⁰⁵U woord is ’n lamp vir my voete en ’n lig op my pad.

¹⁰⁶Ek het reeds belowe, en ek bevestig: u regverdige bepalings sal ek gehoorsaam.

¹⁰⁷Ek het baie swaargekry, Here. Vernuwe my lewe volgens u woord.

¹⁰⁸Here, aanvaar die offers van my mond, en leer my u bepalings.

¹⁰⁹My lewe is gedurig in die weegskaal, maar u gebooie sal ek nie vergeet nie.

¹¹⁰Die goddeloses stel vir my ’n strik; tog sal ek van u bevele nie afdwaal nie.

¹¹¹U verbondsbepalings is my erfdeel vir altyd; dit is die vreugde van my hart.

¹¹²Ek wil leef volgens u voorskrifte, vir altyd, tot die einde toe.

¹¹³Ek haat besluitelose mense, maar u gebooie het ek lief.

¹¹⁴U is my toevlug en beskermer; ek vertrou op u woord.

¹¹⁵Gaan weg van my, kwaaddoeners, want ek gehoorsaam die gebooie van my God.

¹¹⁶Hou my staande soos U beloof het sodat ek kan lewe. Laat my nie beskaam wees in my hoop nie.

¹¹⁷Ondersteun my en ek sal gered word; ek sal u voorskrifte altyd eerbiedig.

¹¹⁸U verwerp almal wat van u voorskrifte afwyk. Hulle ontrou lei tot selfbedrog.

¹¹⁹Al die bose mense van die aarde is soos skuim wat U afskep; daarom het ek u waarskuwings lief.

¹²⁰Ek bewe van vrees vir U; ek vrees u oordeel.

¹²¹Moenie my oorlaat aan die genade van my vyande nie, ek het gedoen wat reg en regverdig is.

¹²²Beloof tog dat dit goed sal gaan met u dienaar. Moenie dat verwaande mense my verdruk nie.

¹²³Ek ooreis my oë om u redding te sien en u woord van geregtigheid.

¹²⁴Behandel u dienaar volgens u troue liefde, en leer my u voorskrifte.

¹²⁵Ek is u dienaar; gee my die vermoë om te onderskei sodat ek u voorwaardes kan verstaan.

¹²⁶Dis tyd dat U optree, Here, want hulle het u gebooie oortree.

¹²⁷Daarom is ek lief vir u opdragte, meer as goud, selfs die fynste goud.

¹²⁸Omdat elkeen van u bevele reg is, haat ek elke verkeerde pad.

¹²⁹U voorwaardes is wonderlik; daarom gehoorsaam ek hulle.

¹³⁰Begrip van u woord bring lig; dit gee insig aan die eenvoudige.

¹³¹My mond is oop en ek snak na asem, want ek verlang na u gebooie.

¹³²Kyk tog na my in u genade, soos U doen vir almal wat u Naam liefhet.

¹³³Rig my treë deur u woord sodat boosheid my nie oorval nie.

¹³⁴Red my van menslike verdrukking sodat ek u bevele kan gehoorsaam.

¹³⁵Laat u guns oor u dienaar skyn; leer my al u voorskrifte.

¹³⁶Trane vloei in strome oor my wange omdat mense u gebooie minag.

¹³⁷Here, U is regverdig, en u oordele is reg.

¹³⁸U vereistes is regverdig; dit is baie betroubaar.

¹³⁹My ontsteltenis oorweldig my, want my vyande verontagsaam u woorde.

¹⁴⁰U beloftes is deeglik beproef; u dienaar het dit lief.

¹⁴¹Al is ek gering en verag, ek misken nie u bevele nie.

¹⁴²U regverdigheid duur vir altyd, en u gebooie is betroubaar.

¹⁴³Angs en benoudheid sak op my toe, maar u gebooie is my vreugde.

¹⁴⁴U vereistes is altyd regverdig; gee my insig sodat ek kan lewe.

¹⁴⁵Ek roep tot U met my hele hart; antwoord my tog, Here! U voorskrifte sal ek gehoorsaam.

¹⁴⁶Ek roep na U: Red my, en ek sal u vereistes gehoorsaam.

¹⁴⁷Voor dagbreek roep ek om hulp, en plaas my hoop op u woord.

¹⁴⁸Die hele nag lê ek wakker om u woord te oordink.

¹⁴⁹Luister na my roepstem, Here, op grond van u troue liefde. Laat my lewe op grond van u regverdigheid.

¹⁵⁰Sluwe vervolgers kom al nader, maar lewe ver van u gebooie af.

¹⁵¹Maar U is naby, Here, en al u gebooie is betroubaar.

¹⁵²Van lankal af het ek geweet dat u eise nooit verander nie. Res

¹⁵³Kyk tog na my lyding en red my; u gebooie het ek tog nie vergeet nie.

¹⁵⁴Behartig tog my saak en bevry my! Laat ek lewe soos U beloof het.

¹⁵⁵Bose mense is ver van redding, want hulle steur hulle nie aan u voorskrifte nie.

¹⁵⁶Groot is u barmhartigheid, Here! Hou my lewe in stand volgens u bepalings.

¹⁵⁷My vervolgers en vyande is talryk; tog wyk ek nie af van u eise nie.

¹⁵⁸Ek kyk met afkeer na die ontroues, want hulle misken u woord.

¹⁵⁹Sien raak dat ek u bevele liefhet, Here. Laat my lewe op grond van u liefde.

¹⁶⁰Alles wat U sê, is betroubaar; u regverdige bepalings is vir altyd.

¹⁶¹Heersers vervolg my sonder oorsaak, maar al wat ek vrees, is u woord.

¹⁶²Ek verheug my in u woord soos iemand wat ’n groot skat ontdek.

¹⁶³Alle valsheid haat en verafsku ek, maar u gebooie het ek lief.

¹⁶⁴Ek loof U sewe keer per dag omdat al u bepalings regverdig is.

¹⁶⁵Hulle wat u gebooie liefhet, het groot sekuriteit en niks sal hulle laat struikel nie.

¹⁶⁶Ek sien uit na u redding, Here; daarom voer ek u gebooie uit.

¹⁶⁷Ek het u eise gehoorsaam, en het dit baie lief.

¹⁶⁸Ek gehoorsaam u bevele en eise, want U weet van alles wat ek doen.

¹⁶⁹Here, luister na my geroep; gee vir my insig soos U beloof het.

¹⁷⁰Luister tog na my smeekgebed; red my soos U beloof het.

¹⁷¹Laat my lippe uitbreek met lof, want U het my u voorskrifte geleer.

¹⁷²Laat my tong sing oor u woord, want u bepalings is regverdig.

¹⁷³Mag U gereed wees om my te help, want u bevele het ek eerste gestel.

¹⁷⁴Here, ek het verlang na u redding, en u gebooie is my vreugde.

¹⁷⁵Laat my lewe sodat ek U kan prys, en mag u bepalings my ondersteun.

¹⁷⁶Soos ’n verlore skaap het ek gedwaal; kom en soek my tog, want u gebooie het ek nie vergeet nie.