Psalms 108— NLV

¹***

²Ek vertrou geheel en al op U, o God. Ek wil sing, ja, U heelhartig eer.

³Word wakker, harp en lier! Ek wil die dagbreek wakker maak!

⁴Voor die volke wil ek U prys, Here, onder die nasies wil ek u lof besing.

⁵Want u trou is hoog bo die hemele, u waarheid reik tot in die wolke.

⁶Wees verhewe tot bo die hemele, o God, en laat u heerlikheid erken word oor die hele aarde.

⁷Red ons met u krag en help ons sodat U u geliefde volk kan red.

⁸God het dit by sy heiligheid belowe: As oorwinnaar sal Ek Sigem verdeel en die vallei van Sukkot uitmeet.

⁹Gilead is Myne, en Manasse behoort aan My. Efraim sal my krygsmanne oplewer, en Juda my konings.

¹⁰Moab sal my nederige dienaar word en Edom sal my slaaf wees. Oor Filistea juig Ek as oorwinnaar.

¹¹Wie sal my lei na die versterkte stad? Wie sal my na Edom toe bring?

¹²Het U ons verwerp, o God? Gaan U, o God, nie saam met ons leërs opruk nie?

¹³Help ons tog teen ons vyande, want menslike hulp is waardeloos.

¹⁴Met God se hulp sal ons seëvier, want Hy sal ons vyande vertrap.