Psalms 106— NLV

¹Prys die Here! Dank die Here, want Hy is goed! Sy trou ken geen einde nie.

²Wie kan die magtige dade van die Here beskryf, of sy lof ten volle bekendmaak?

³Gelukkig is hy wat geregtigheid laat geskied en wat altyd doen wat reg is.

⁴Dink aan my, Here, wanneer U aan u volk guns bewys; kom my met u redding tot hulp

⁵sodat ek deel kan hê aan die voorspoed van u uitverkorenes, my verheug in die vreugde van u nasie, en U loof saam met u eie volk.

⁶Ons en ons voorouers het gesondig. Ons het oortree en is skuldig.

⁷In Egipte het ons voorouers die Here se wonders gering geag, en sy baie dade van goedheid vergeet. By die Rietsee het hulle teen Hom in opstand gekom.

⁸Tog het Hy hulle gered ter wille van die eer van sy Naam, om sy mag bekend te maak.

⁹Op sy bevel het die Rietsee opgedroog sodat Israel op die seebodem kon trek. Dit was so droog soos ’n woestyn.

¹⁰Uit die vyand se mag het Hy hulle gered en hulle uit hulle teenstanders se mag verlos.

¹¹Water het toe hulle vyande bedek. Nie een van hulle het dit oorleef nie.

¹²Toe eers het Israel sy beloftes geglo en het hulle sy lof besing.

¹³Tog het hulle gou sy dade vergeet en nie op sy leiding gewag nie.

¹⁴In die woestyn het hulle begeertes opgevlam. In die wildernis het hulle God se geduld beproef.

¹⁵Hy het gegee wat hulle gevra het, maar hulle ook getref met ’n siekte.

¹⁶In die kamp was hulle jaloers op Moses, en ook Aäron, wat aan die Here gewy was.

¹⁷Die aarde het oopgegaan, Datan ingesluk, en Abiram en sy bende begrawe.

¹⁸Onder die bende het vuur gewoed, vlamme het die bose mense verteer.

¹⁹By Horeb het hulle ’n kalf gemaak, en ’n beeld van metaal aanbid.

²⁰Hulle roemryke God het hulle verruil vir die beeld van ’n bees wat gras vreet.

²¹Hulle het God vergeet, hulle redder wat in Egipte groot dinge gedoen het:

²²wonderlike dinge in die land Egipte, ontsagwekkende dade by die Rietsee.

²³Hy het gesê Hy sou hulle vernietig, maar Moses, sy uitverkorene, het vir die volk in die bres getree en gepleit dat God hulle nie in sy toorn vernietig nie.

²⁴Maar die volk het die vrugbare land verwerp, en nie sy beloftes geglo nie.

²⁵Hulle het in hulle tente gekla en nie na die Here geluister nie.

²⁶Daarom het Hy ’n eed afgelê dat Hy hulle in die woestyn sal laat omkom,

²⁷dat hulle nakomelinge onder die nasies sou sterf, en oor die aarde verstrooi sou word.

²⁸Maar hulle het Baäl-Peor vereer en geëet van die offers wat aan dooie afgode gewy is.

²⁹Met hulle dade het hulle Hom getart sodat ’n plaag hulle getref het.

³⁰Maar Pinehas het tussenbeide getree, en so is die plaag gestuit.

³¹Hy is beskou as ’n regverdige man, geslag na geslag, vir altyd.

³²By die waters van Meriba het hulle die Here kwaad gemaak, en so het hulle vir Moses ernstige probleme besorg.

³³Hulle het hom opstandig gemaak sodat hy onbesonne dinge gesê het.

³⁴Israel het nie die nasies uitgeroei soos die Here hulle beveel het nie

³⁵en het eerder met die nasies vermeng en hulle bose gewoontes aangeleer.

³⁶Hulle het die nasies se afgode vereer, en dit het vir hulle ’n strik geword.

³⁷Hulle het hulle seuns en dogters aan demone geoffer.

³⁸Hulle het onskuldige bloed vergiet, bloed van hulle seuns en dogters wat hulle geoffer het aan die afgodsbeelde van Kanaän, en so die land met bloed bevlek.

³⁹Hierdie dade het hulle onrein gemaak, net soos iemand wat egbreuk pleeg.

⁴⁰Die Here se toorn het teen sy volk ontbrand, en Hy het sy eie volk verafsku.

⁴¹Hy het hulle oorgegee aan die nasies; hulle haters het oor hulle geheers.

⁴²Hulle vyande het hulle verdruk en aan hulle mag onderwerp.

⁴³Baie kere het Hy sy volk verlos, maar hulle het opstandig gebly en verder in hulle sondes weggesink.

⁴⁴Tog het Hy hulle ellende raakgesien, en geluister na hulle hulpgeroep.

⁴⁵Hy het gedink aan sy verbond met hulle, en Hy was genadig op grond van sy onfeilbare liefde.

⁴⁶Hy het bewerk dat hulle veroweraars hulle met medelye behandel het.

⁴⁷Here ons God, red ons! Versamel ons weer uit die nasies sodat ons u heilige Naam kan prys, in U bly kan wees, en U kan loof.

⁴⁸Geseënd is die Here, God van Israel, van ewigheid tot ewigheid! Laat die hele volk sê: “Amen!” Prys die Here!