Psalms 105— NLV

¹Dank die Here, maak sy Naam bekend! Maak sy dade bekend aan die nasies.

²Sing vir Hom, sing tot sy eer! Vertel van sy wonderdade aan almal.

³Roem sy heilige Naam. Wees bly, dienaars van die Here!

⁴Vra na die Here en sy krag, hou aan om Hom te soek.

⁵Dink aan sy wonderdade, sy tekens en sy regspraak.

⁶Kinders van Abraham, sy dienaar, nakomelinge van Jakob, God se uitverkorenes.

⁷Hy is die Here ons God. Sy uitsprake is oor die hele aarde.

⁸Hy sal sy verbond altyd onthou, die bepalings wat Hy beveel het vir duisend geslagte,

⁹die verbond met Abraham gesluit en sy eed aan Isak.

¹⁰Hy het dit aan Jakob bevestig as ’n vaste bepaling, aan Israel as ’n voortdurende verbond:

¹¹“Ek gee die land Kanaän vir jou as jou eie besitting.”

¹²Toe hulle maar min was, ’n klein groepie mense en vreemdelinge in die land,

¹³het hulle rondgetrek tussen die volke, van een koninkryk na die ander.

¹⁴Hy het nie toegelaat dat hulle verdruk word nie. Ter wille van hulle, het Hy konings gewaarsku:

¹⁵“Moenie my gesalfdes aanraak, en my profete kwaad aandoen nie.”

¹⁶Hy het ’n hongersnood oor die land gebring, en hulle kosvoorrade laat opraak.

¹⁷Hy het iemand vooruitgestuur: Josef, wat verkoop is as slaaf.

¹⁸Sy voete het hulle in boeie gedwing, en sy nek in ’n ysterhalsband gesit

¹⁹tot sy woord waar geword het, en die Here se woord hom reg bewys het.

²⁰Toe het Farao hom vrygelaat; die heerser oor volke het hom bevry.

²¹Hy het hom aangestel oor sy huis, met gesag oor al sy eiendomme.

²²Hy kon aan sy beamptes bevele gee, en sy hoofamptenare wysheid leer.

²³Toe het Israel na Egipte toe gekom. Jakob het as vreemdeling in die land Egipte gaan woon.

²⁴Die Here het sy volk laat vermeerder en hulle was magtiger as die vyande.

²⁵Hy het hulle gesindheid verander sodat hulle sy volk gehaat het, en listig saamgesweer het teen die dienaars van die Here.

²⁶Hy het Moses, sy dienaar, gestuur, en vir Aäron, wat Hy verkies het.

²⁷Hulle het wondertekens tussen hulle verrig, en wonderwerke in die land Egipte.

²⁸Hy het duisternis gestuur, en dit het donker geword. Nogtans het die Egiptenaars hulle teen sy bevele verset.

²⁹Hy het hulle water in bloed verander, en so al die visse laat vrek.

³⁰Toe het paddas die land oordek, tot in die koning se slaapkamer.

³¹Op sy bevel het swerms insekte gekom, en muggies oor die hele land.

³²Hy het hael gestuur in plaas van reën, en weerlig oor hulle hele land.

³³Wingerde en vyebome het Hy getref, en al hulle bome stukkend geslaan.

³⁴Op sy bevel het sprinkane gekom, hordes sprinkane sonder tal.

³⁵Al die groen plante in die land het hulle verorber, al die produkte van die landerye het hulle vernietig.

³⁶Die oudste seuns in hulle land het Hy laat sterf, die eerstelinge van elke huisgesin.

³⁷Toe het Hy Israel uit Egipte uitgelei, oorlaai met silwer en goud. Niemand in die stamme het gestrompel nie.

³⁸Egipte was bly toe hulle getrek het, want hulle was almal baie bang vir hulle.

³⁹Die Here het as bedekking ’n wolk oor hulle uitgesprei, en vuur om die nag te verlig.

⁴⁰Hulle het kos gevra, en Hy het kwartels gestuur; met brood uit die hemel het Hy hulle versadig.

⁴¹Hy het ’n rots gekloof, en water het uitgestroom, ’n rivier het in dorre plekke gevloei.

⁴²Hy het inderdaad sy heilige belofte aan Abraham sy dienaar onthou.

⁴³Hy het sy volk met vreugde gelei, sy uitverkorenes uitgelei met gejuig.

⁴⁴Die lande van nasies het Hy aan hulle gegee, en wat ander geplant het, het hulle geoes

⁴⁵sodat hulle sy gebooie sou onderhou en sy voorskrifte sou gehoorsaam. Prys die Here!