Job 40— NLV

¹Die Here het toe vir Job uit ’n storm geantwoord:

²“Gaan staan regop soos ’n man. Ek wil ’n paar vrae aan jou stel. Jy moet My antwoord.

³“Wil jy sê dat Ek verkeerd is? Wil jy My veroordeel sodat jy geregverdig kan wees?

⁴Is jy so sterk soos God? Kan jy jou stem uit die onweer laat hoor?

⁵Laat jou gesag dan geld. Tree op in jou koninklike majesteit.

⁶Gee uiting aan jou woede sodat dit oorkook oor die hoogmoediges en hulle verneder.

⁷Vernietig slegte mense met een blik. Loop oor die goddeloses.

⁸Begrawe almal in die stof. Sluit hulle toe in die graf.

⁹Selfs Ek sal jou dan prys, want jy sal jou deur jou eie krag kan red.

¹⁰“Kyk na die seekoei*. Ek het hom gemaak net soos Ek jou gemaak het. Hy vreet gras soos ’n bees.

¹¹Hy het ’n kragtige liggaam met sterk spiere.

¹²Sy stert is so reguit soos ’n seder. Sy boudspiere is inmekaargevleg.

¹³Sy bene is soos bronspype. Sy ledemate so sterk soos yster.

¹⁴Dit is ’n uitstekende voorbeeld van God se handewerk. Net sy Maker kan hom in toom hou.

¹⁵Die berge lewer vir hom voedsel, en al die wilde diere speel daar.

¹⁶Hy lê onder waterplante. Hy skuil tussen die riete in die moeras.

¹⁷Hy skuil in die skadu van die waterplante tussen die wilgers langs die rivier.

¹⁸As die rivier in vloed is, word hy nie bang nie. Hy is rustig selfs as die Jordaan rondom hom bruis.

¹⁹Niemand kan hom van voor af pak en ’n ring in sy neus sit nie.”

²⁰“Kan jy ’n krokodil* met ’n hoek vang? Kan jy ’n tou bind om sy bek?

²¹Kan jy ’n lyn steek deur sy neus of sy kake met ’n haak deurboor?

²²Sal hy by jou pleit om genade, of soebat om vir hom jammer te wees?

²³Sal hy instem om vir jou te werk? Kan jy van hom ’n slaaf maak vir die res van sy lewe?

²⁴Sal jy hom mak maak soos ’n voëltjie, of vir hom ’n leiband aansit as ’n speelding vir jou dogters?

²⁵Sal handelaars hom wil koop? Kan hulle hom verkoop in hulle winkels?

²⁶Kan jy sy vel deurboor met pyle, of sy kop met ’n harpoen?

²⁷Lê gerus jou hand op hom! Jy sal vir altyd die geveg onthou en dit nooit weer waag nie.

²⁸Jy probeer verniet om hom te vang. Die jagter is oorweldig as hy hom net sien.”