Job 38— NLV

¹Toe het die Here Job uit ’n stormwind geantwoord:

²“Wie is dit wat my wysheid bevraagteken met woorde van onkunde?

³Staal jouself! Ek sal die vrae stel, en dan antwoord jy My.

⁴“Waar was jy toe Ek die fondasie van die aarde gelê het? Sê My as jy so baie weet!

⁵Wie het die aarde opgemeet? Jy weet tog seker! En wie het die maatband oor die aarde gespan?

⁶Waarop rus die fondasie van die aarde? En wie het sy hoeksteen gelê?

⁷Toe het al die môresterre saamgesing en die hemelse wesens* het van vreugde gejuig.

⁸“Wie het die grense van die see vasgestel toe dit uitgeborrel het

⁹en Ek dit bedek het met wolke en dik duisternis?

¹⁰Ek het grense vir hom gestel. Ek het hom agter slot en grendel gesit.

¹¹Ek het gesê: ‘Jy mag tot hier kom, en nie verder nie. Hier moet jou trotse golwe breek.’

¹²“Het jy ooit die môre beveel om te verskyn? Het jy die dag laat breek in die ooste?

¹³Het jy al die lig opdrag gegee om oor die aarde te sprei sodat die nag se boosheid kan ophou?

¹⁴Die aarde neem vorm aan soos die lig toeneem. Dit neem vorm aan soos voue in ’n kledingstuk.

¹⁵Die lig versteur die rooftog van die kwaaddoener. Hulle kan nie meer die arm lig om geweld te pleeg nie.

¹⁶“Was jy al by die fonteine waar die see ontspring? Het jy al daar rondgeloop en sy dieptes verken?

¹⁷Weet jy waar die ingang van die doderyk is, waar die donkerte skuil?

¹⁸Begryp jy hoe groot die aarde is? Sê My as jy dit alles weet.

¹⁹“Waar kom die lig vandaan? En waarheen wyk die donkerte?

²⁰Kan jy hulle terugvat na hulle huis toe? Weet jy hoe om daar uit te kom?

²¹Natuurlik weet jy dit alles! Jy is mos gebore voor dit alles geskep is. Jy het nou al soveel ervaring!

²²“Was jy al by die skatkamers van die sneeu? Het jy al gesien waar die hael gebêre word?

²³Ek gaar dit op vir ’n tyd van rampe, vir die dag van stryd en oorlog.

²⁴Waar is die pad na die oorsprong van lig? Waar is die tuiste van die oostewind?

²⁵Wie grawe ’n kanaal vir die stortreën? Wie maak ’n pad vir die weerlig?

²⁶Wie giet reën oor die droë grond, in ’n woestyn waar niemand woon nie?

²⁷Wie stuur die reën wat die droë land natmaak sodat groen gras uitspruit?

²⁸Het die reën ’n vader? Waar kom dou vandaan?

²⁹Wie is die moeder van ys? Wie gee geboorte aan ryp uit die lug?

³⁰Dan word water so hard soos ’n rots, en die watervlak verys.

³¹“Kan jy die Sewester vasknoop? Of die bande van Orion losmaak?

³²Kan jy sorg dat die sterre op die regte tyd opkom? Kan jy die Beer met sy kleintjies laat uitkom?

³³Ken jy die wette van die natuur? Weet jy hoe God oor die aarde regeer?

³⁴“Kan jy met die wolke praat sodat hulle begin reën?

³⁵Kan jy weerligstrale maak, en dit laat tref soos jy wil?

³⁶Wie gee intuïsie en instink aan die mens?

³⁷Wie is slim genoeg om die wolke te tel? Wie kan die waterkanne van die hemel omkeer

³⁸wanneer die grond droog is en die kluite kliphard?”