Job 22— NLV

¹Elifas die Temaniet het geantwoord:

²“Kan ’n mens se dade enige voordeel inhou vir God? Kan selfs ’n baie wyse mens Hom help?

³Watter plesier het die Almagtige daarin dat jy regverdig is? Baat Hy daarby as jy volmaak is?

⁴“Is dit oor jou eerbied vir Hom dat Hy jou aankla en veroordeel?

⁵Hoegenaamd nie! Dis oor jou boosheid! Jou skuld ken geen perke nie!

⁶Dalk het jy geld aan jou vriend geleen, en sy klere gehou as borg. Hy moes rondloop sonder klere.

⁷Miskien wou jy nie water gee vir die dorstige, en kos vir die hongerige nie.

⁸Jy, ’n ryk man, het grond besit. Mense het jou geëer.

⁹Tog het jy weduwees sonder hulp weggestuur. Of jy het weeskinders dakloos gelaat.

¹⁰Dit is waarom jy omring is met strikke en jy ’n skielike ramp vrees.

¹¹Daarom kan jy nie in die donker sien nie en vloedwaters stroom oor jou.

¹²God is so groot, hoër as die hoogste hemel, verder as die verste ster.

¹³Maar jy sê: ‘Dis hoekom God nie kan sien wat ek doen nie! Hoe kan Hy oordeel deur so ’n diep duisternis?

¹⁴Want dik wolke omhul Hom. Hy kan ons nie sien nie. Hy loop daar bo in die hemel rond.’

¹⁵Wil jy aanhou loop op die ou paaie van goddelose mense?

¹⁶Hulle is weggeruk in die fleur van hulle lewe, en die dinge waarop hulle hulle lewe gebou het, het weggespoel.

¹⁷Hulle het mos vir God gesê: ‘Los ons alleen! Wat kan die Almagtige aan ons doen?’

¹⁸Want hulle het vergeet dat Hy vir hulle huise gegee het vol goeie dinge. Ek wil niks te doen hê met hulle lewenswyse nie.

¹⁹“Die regverdige sal bly wees om te sien hoe goddeloses ondergaan. Die onskuldiges lag en spot met hulle.

²⁰Hulle sê: ‘Ons vyande is vernietig! Alles wat hulle gehad het, het verbrand!’

²¹“Onderwerp jou aan God, dan sal jy vrede hê en sal alles met jou goed gaan.

²²Luister na sy voorskrifte en bêre hulle in jou hart.

²³As jy terugkeer na die Almagtige en jou lewe skoonmaak, sal jy herstel word.

²⁴Los jou sug na geld, en gooi jou kosbare skatte in die rivier.

²⁵Dan sal die Almagtige self jou rykdom wees. Hy sal vir jou wees soos kosbare silwer.

²⁶Dan sal jy bly wees oor die Almagtige en sal jy opkyk na God.

²⁷Jy sal tot Hom bid, en Hy sal jou hoor. Jy sal doen wat jy Hom belowe het.

²⁸Wat jy besluit om te doen, sal gebeur. Dit sal lig wees op die pad voor jou.

²⁹As iemand val en jy vra dat God hulle optel, sal Hy hulle red.

³⁰Hy sal selfs sondaars red, hulle sal verlos word omdat jy onskuldig is.”