Psalms 71— AFR20

¹By U, Here, skuil ek; laat my nie vir altyd beskaamd staan nie.

²Red my en bevry my deur u •geregtigheid; draai u oor na my en verlos my.

³Wees vir my 'n rots, 'n skuiling waarheen ek altyd kan gaan, wat U beskik vir my verlossing. Ja, U is my rotsvesting en my bergskuiling.

⁴My God, bevry my uit die hand van goddeloses, uit die greep van hulle wat onreg doen en verdruk.

⁵Want U is my hoop, my Heer; Here, van my jeug af stel ek my vertroue in U.

⁶Op U steun ek van die moederskoot af; uit die ingewande van my moeder het U my losgeknip. U alleen loof ek deurentyd.

⁷Vir baie was ek 'n slegte teken, maar U was my sterk vesting.

⁸My mond is vol lof vir U, die hele dag lank vol van u heerlikheid.

⁹Moet my nie verwerp in die tyd van die ouderdom nie; moet my nie verlaat wanneer my kragte afneem nie.

¹⁰Want my vyande praat oor my; hulle wat my dophou, maak saam planne

¹¹en sê: “God het hom verlaat; agtervolg hom en gryp hom, want niemand kan hom red nie.”

¹²O God, bly nie ver van my af nie; my God, kom my gou te hulp.

¹³Laat hulle wat my lewe bedreig, beskaamd staan. Laat hulle wat my onheil soek, in skande en vernedering gehul wees.

¹⁴Maar ek, ek sal voortdurend hoop, al u lof steeds meer besing.

¹⁵My mond sal van u geregtigheid vertel, van u verlossingsdade, die hele dag lank, al is die getal bo my begrip.

¹⁶Ek sal ingaan en getuig van die magtige dade van die Here, my Heer; ek sal getuig van u geregtigheid, net van U alleen.

¹⁷O God, U het my geleer van my jeug af, en tot nou toe maak ek u wonderdade bekend.

¹⁸Selfs tot in die ouderdom en grysheid, o God, moet U my nie verlaat nie, totdat ek aan die nageslag die mag van u arm bekend gemaak het, aan almal wat kom, u mag.

¹⁹U geregtigheid, o God, strek tot aan die hemel, U wat grootse dade verrig het. O God, wie is soos U?

²⁰U wat my baie benoudhede en rampe laat ervaar het, U sal my weer lewend maak, my weer uit die watermassas van die wêreld laat opkom.

²¹U moet tog my aansien verhoog, omdraai en my troos.

²²Dan sal ook ek U dank met begeleiding van harpsnare, vir u getrouheid, my God; ek wil U besing met begeleiding van 'n lier, o •Heilige van Israel.

²³My lippe sal jubel wanneer ek U besing, ja, my hele wese, wat U vrygemaak het.

²⁴Ook my tong sal die hele dag oor u geregtigheid prewel, omdat daardie mense beskaamd staan, omdat hulle wat my onheil soek, in die skande gekom het.