Psalms 33— AFR20

¹Regverdiges, jubel oor die Here! 'n Loflied pas by opregtes.

²Dank die Here met begeleiding van liere; besing Hom met begeleiding van tiensnarige harpe.

³Sing vir Hom 'n nuwe lied; speel mooi op snaarinstrumente met uitroepe van vreugde.

⁴Want die woord van die Here is reg, en al sy werk is betroubaar.

⁵Hy is lief vir reg en •geregtigheid; die troue liefde van die Here vul die aarde.

⁶Deur die woord van die Here is die hemele gemaak en deur die asem van sy mond die hemel se hele leër.

⁷Hy hou die water van die see soos in 'n dam bymekaar; Hy gaar die •oerwaters op in voorraadkamers.

⁸Die hele aarde moet vir die Here ontsag hê, Hom moet al die bewoners van die wêreld vrees;

⁹want Hy het gepraat, en dit was daar, Hy het beveel, en toe staan dit daar.

¹⁰Die Here verydel die raadsplanne van nasies, Hy dwarsboom die planne van volke.

¹¹Die raadsplan van die Here bestaan vir ewig, die planne wat Hy bedink, van geslag tot geslag.

¹²Gelukkig is die nasie wie se God die Here is, die volk wat Hy as sy eiendom gekies het.

¹³Uit die hemel kyk die Here, Hy sien alle mense.

¹⁴Uit die plek waar Hy woon beskou Hy al die bewoners van die aarde,

¹⁵Hy wat elkeen van hulle se denke vorm, insig het in alles wat hulle doen.

¹⁶Geen koning word deur 'n groot leër verlos nie; 'n krygsheld red homself nie deur groot krag nie.

¹⁷'n Perd bied vals hoop vir oorwinning, deur sy groot krag kan hy nie bevry nie.

¹⁸Kyk, die Here hou sy oog op dié wat vir Hom ontsag het, op dié wat hulle hoop vestig op sy troue liefde,

¹⁹om hulle lewens van die dood te red en hulle aan die lewe te hou tydens hongersnood.

²⁰Met ons hele wese wag ons op die Here; Hy is ons hulp en ons skild.

²¹Want oor Hom is ons harte verheug, ja, op sy •heilige Naam vertrou ons.

²²Mag u troue liefde oor ons wees, Here, terwyl ons op U wag!