Proverbs 4— AFR20

¹Seuns, luister na die vermaning van 'n vader, en slaan ag daarop om insig te leer ken.

²Want dit is goeie onderrig wat ek julle gee; my onderwysing – moet dit nie verontagsaam nie.

³Toe ek 'n seun was by my vader, onervare, en die enigste voor my moeder,

⁴het hy my geleer en vir my gesê: “Jou hart moet my woorde vashou. Kom my gebooie na, dan sal jy leef.

⁵Verwerf wysheid, verwerf insig, vergeet dit nie; wyk nie af van die woorde uit my mond nie.

⁶Moet haar, die wysheid, nie verontagsaam nie; dan sal sy jou beskerm. Wees lief vir haar, dan sal sy jou bewaak.

⁷Die begin van wysheid is: Verwerf wysheid, verwerf insig met alles wat jy besit!

⁸Stel haar hoog op prys, dan sal sy jou verhoog; sy sal aan jou eer gee as jy haar omarm.

⁹Sy sal op jou kop 'n swierige krans sit, 'n sierlike kroon aan jou skenk.

¹⁰“ Luister, my seun, en aanvaar my woorde sodat jou lewensjare baie kan wees.

¹¹Op die pad van wysheid sal ek jou begelei, ek sal jou laat loop op reguit paaie.

¹²Wanneer jy loop, sal jou voetstappe nie belemmer word nie; en as jy hardloop, sal jy nie struikel nie.

¹³Hou vas aan vermaning, moet dit nie laat vaar nie; hou daarby, want dit is jou lewe.

¹⁴Op die pad van goddeloses moet jy nie kom nie; en moenie die weg van slegte mense betree nie.

¹⁵Vermy dit, moet dit nie eers oorsteek nie, draai weg daarvan en gaan verby.

¹⁶Want hulle kan nie slaap nie, behalwe as hulle kwaad doen; hulle slaap bly weg, tensy hulle iemand tot 'n val bring.

¹⁷Ja, hulle eet brood van goddeloosheid, en wyn van geweld drink hulle.

¹⁸Die pad van regverdiges is soos die helder oggendlig – dit verhelder geleidelik tot die volle dag.

¹⁹Die weg van goddeloses is soos die donker – hulle weet nie waaroor hulle struikel nie.

²⁰“ My seun, slaan ag op my uitsprake; spits jou ore vir my woorde.

²¹Laat hulle nie aan jou oë ontglip nie; bewaar hulle diep in jou hart.

²²Want dit is die lewe vir hulle wat dit vind; vir die hele liggaam bring dit genesing.

²³Bewaak jou hart meer as enigiets wat bewaar word, want daaruit ontspring die lewe.

²⁴Bly weg van 'n mond wat valsheid verkondig, en slinkse lippe, hou dit ver van jou.

²⁵Jou oë moet vorentoe kyk, jou blik moet reg voor jou gerig wees.

²⁶Hou die pad vir jou voet gelyk; en al jou weë, laat dit bestendig wees.

²⁷Moenie regs of links afdraai nie, hou jou voet weg van die kwaad.”