Proverbs 3— AFR20

¹My seun, my onderrig moet jy nie vergeet nie, en my gebooie – jou hart moet daarby hou;

²want die lengte van jou leeftyd, die lewensjare en vrede sal dan vir jou vermeerder word.

³Troue liefde en waarheid moet jou nooit verlaat nie. Bind dit om jou nek, skryf dit op die tafel van jou hart,

⁴dan sal jy guns en goeie begrip vind in die oë van God en die mense.

⁵Vertrou op die Here met jou hele hart – op jou eie insig moet jy nie staatmaak nie.

⁶Ken Hom in al jou weë, en Hy sal jou paaie reguit maak.

⁷Moenie wys wees in jou eie oë nie. Jy moet ontsag hê vir die Here, bly weg van die kwaad.

⁸Genesing sal dit bring vir jou liggaam en verkwikking vir jou gebeente.

⁹Eer die Here met jou rykdom, met die beste deel van jou volle oes;

¹⁰dan sal jou graanskure oorvol wees, en van •nuwe wyn sal jou parskuipe oorloop.

¹¹Die vermaning van die Here, my seun, moet dit nie verwerp nie, en moenie 'n afkeer hê van sy teregwysing nie.

¹²Want die een vir wie die Here liefhet, wys Hy tereg, soos 'n vader die seun vir wie hy omgee.

¹³Hoe gelukkig is 'n mens wat wysheid vind, en 'n mens wat verstandigheid verkry!

¹⁴Ja, die wins wat wysheid lewer, is meer as dié van silwer, meer as dié van goud is haar opbrengs.

¹⁵Sy is kosbaarder as koraal; niks wat jy begeer, kan met haar vergelyk word nie.

¹⁶'n Lang lewe is in haar regterhand, en in haar linkerhand, rykdom en eer.

¹⁷Haar weë is aangename weë, en al haar paaie is vrede.

¹⁸'n Boom van lewe is sy vir hulle wat haar aangryp, en hulle wat haar vashou, word elkeen gelukkig genoem.

¹⁹Die Here self het die aarde gegrondves met wysheid, die hemel gevestig met verstand.

²⁰Deur sy kennis is die •oerwaters gekloof en drup die wolke dou.

²¹My seun, vindingrykheid en goeie oordeel – laat dit nie aan jou oë ontglip nie; hou daarby.

²²Dit sal lewe wees vir jou wese, 'n sieraad vir jou nek.

²³Dan sal jy veilig loop op jou pad; jou voet sal jy nie stamp nie.

²⁴As jy gaan lê, sal jy nie verskrik wees nie, as jy lê, sal jou slaap soet wees.

²⁵Jy hoef nie bang te wees vir 'n onverwagte verskrikking, of vir die teenspoed van goddeloses wanneer dit kom nie.

²⁶Want die Here sal aan jou sy wees, en Hy sal keer dat jou voet in 'n strik trap.

²⁷Moenie iets goeds weerhou van wie dit verdien, terwyl dit in jou mag is om op te tree nie.

²⁸Moenie vir jou medemens sê, “Gaan en kom later weer – môre sal ek dit gee!” terwyl jy dit by jou het nie.

²⁹Moenie teen jou medemens kwaad smee, terwyl hy in goeie trou by jou woon nie.

³⁰Moenie onnodig 'n saak teen iemand begin, as hy jou geen kwaad aangedoen het nie.

³¹Moenie iemand wat geweld gebruik, beny nie, en moenie enige van sy paaie kies nie;

³²want vir die Here is iemand wat die spoor byster raak, afstootlik – maar opregtes geniet sy vertroue.

³³Die Here se vervloeking rus op die huis van goddeloses, maar die tuiste van regverdiges seën Hy.

³⁴Met spotters spot Hy self, maar aan magteloses skenk Hy genade.

³⁵Eer is wat wyses as erfdeel ontvang, maar dwase, dié verhoog Hy tot skande.