Job 8— AFR20

¹Bildad uit Suag het hierop gereageer en gesê:

²“Hoe lank nog gaan jy hierdie dinge beweer? Die woorde van jou mond is bloot 'n groot klomp wind.

³Sal God die reg verdraai, of sal die Almagtige geregtigheid verdraai?

⁴As jou kinders teen Hom gesondig het, het Hy hulle aan hulle oortreding oorgelaat.

⁵As jy self God egter ywerig soek en by die Almagtige pleit;

⁶as jy onbesproke en opreg is, ja, dan sal Hy oor jou waak, dan sal Hy jou regmatige verblyf herstel.

⁷En al was jou verlede gering, sal jou toekoms baie voorspoedig wees.

⁸“ Ja, gaan doen maar navraag by die vorige geslag; stel vas wat hulle voorouers reeds noukeurig ondersoek het.

⁹Ons is immers van gister en ons weet niks nie; ja, ons lewensdae is net 'n skaduwee op aarde.

¹⁰Sal húlle jou nie onderrig nie, met jou praat nie, uit hulle harte argumente aanvoer nie?

¹¹Sal papirus hoog groei waar daar nie 'n moeras is nie? Sal oewergras gedy waar daar nie water is nie?

¹²Dit is nog besig om te groei, is nog nie gesny nie, dan verwelk dit al – voor al die ander grasse.

¹³So loop die paaie van almal wat van God vergeet: Die hoop van die godloses gaan tot niet –

¹⁴hy wat sy hoop vestig op dun spinnerakdrade, wat in 'n spinnerak sy vertroue stel.

¹⁵As hy teen sy huis leun, bly dit nie staan nie; as hy daaraan vasgryp, hou dit nie stand nie.

¹⁶Hy is 'n plant vol sap in die son, sy ranke brei uit deur sy tuin.

¹⁷Sy wortels raak vervleg met kliphope, hy is op die uitkyk vir 'n tuiste van klip.

¹⁸As hy uit sy plek gepluk word, verloën sy plek hom met, ‘Ek het jou nie gesien nie.’

¹⁹Kyk, dit is die vreugde van sy lewenspad, en uit die grond spruit daar 'n ander een.

²⁰“Kyk, God verwerp nie iemand wat onberispelik optree nie; Hy versterk nie die hand van kwaaddoeners nie.

²¹Hy sal weer jou mond vul met gelag, jou lippe met 'n vreugdekreet.

²²Hulle wat jou haat, sal met skande bedek wees; en die tentwoning van die goddeloses sal nie meer daar wees nie.”