Job 5— AFR20

¹“Roep maar! Sal daar iemand wees wat jou antwoord? Tot wie van die heiliges sal jy jou wend?

²Want ergernis lei tot die dood van 'n sot, en naywer laat die onverstandige sterf.

³Ek self het 'n sot sien wortel skiet, maar skielik kon ek sy tuiste in 'n vloek gebruik.

⁴Sy kinders is ver van veiligheid; hulle word vertrap in die stadspoort, en niemand kan hulle red nie.

⁵Dit wat hy geoes het, word deur hongeres verteer; selfs uit die dorings gaan haal hulle dit; en dorstiges smag na hulle besittings.

⁶Ja, onheil kom nie voort uit die stof nie, en teenspoed spruit nie uit die grond nie;

⁷maar die mens is vir teenspoed gebore, soos vonke na bo vlieg.

⁸“Ek, daarenteen, sou God raadpleeg, aan God sou ek my saak voorlê,

⁹aan Hom wat groot en ondeurgrondelike dinge, ontelbare wonders, doen –

¹⁰Hy wat reën gee oor die aarde, wat water uitstuur oor die oop veld,

¹¹om nederiges op die hoogte te plaas, en hulle wat rou, veilig te maak in die hoogte,

¹²Hy wat die planne van listiges verydel, sodat hulle hande niks suksesvol uitrig nie,

¹³Hy wat wyses met hulle eie slinksheid vang, sodat die planne van geslepenes vinnig tot 'n einde kom.

¹⁴Oordag stuit hulle op die donker; teen die middag tas hulle rond asof dit in die nag is.

¹⁵Hy verlos 'n behoeftige uit die mag van sterkes, van die swaard in hulle monde.

¹⁶So is daar vir armes hoop, en ongeregtigheid hou die mond toe.

¹⁷“ Kyk, gelukkig is die mens vir wie God teregwys; die tugtiging van die Almagtige – moet dit nie verwerp nie!

¹⁸Want Hy is die een wat pyn veroorsaak, maar ook verbind, Hy verbrysel, maar sy hande genees ook.

¹⁹Uit ses benoudhede sal Hy jou red, in sewe sal boosheid jou nie aantas nie.

²⁰In hongersnood sal Hy jou loskoop van die dood, in 'n geveg, uit die mag van die swaard.

²¹Wanneer die tong gesel, word jy weggesteek; jy hoef nie te vrees vir verwoesting wanneer dit kom nie.

²²Vir verwoesting en honger sal jy lag; vir die wilde diere van die aarde sal jy nie bang wees nie.

²³Want met die klippe van die veld het jy 'n verbond; die diere van die veld handhaaf vrede met jou.

²⁴Jy sal dit beleef dat jou tent veilig is; en as jy voorraad neem op jou weiveld, vermis jy niks.

²⁵Jy sal dit beleef dat jou nageslag baie is; jou nakomelinge sal wees soos die plante van die aarde.

²⁶Jy sal in volle lewenskrag na die graf gaan, soos gerwe op hulle tyd na die dorsvloer gaan.

²⁷Kyk, dit is wat ons ondersoek het; so is dit. Luister daarna! Beleef dit self!”