Job 28— AFR20

¹Daar is 'n plek waar silwer vandaan kom, 'n plek vir goud, waar dit uitgewas word.

²Yster word uit delfstof verkry, en erts word gesmelt tot koper.

³Die mens maak 'n einde aan die donker; tot die verste uithoeke bly hy soek na gesteentes in die donker, in stikdonkerte.

⁴Ver van waar iemand woon, sink hulle 'n skag. Vergete deur voetgangers hang hulle daar; weg van sterflinge swaai hulle heen en weer.

⁵Die aarde – daaruit kom kos voort; sy ondergrond word omvergewerp asof deur vuur.

⁶Sy gesteentes is 'n plek van •lasuursteen, en daar is goudstof in.

⁷Dit is 'n pad wat roofvoëls nie ken nie; die oog van valke bespeur dit nie.

⁸Trotse wilde diere betree dit nie; die maanhaar loop nie daarop nie.

⁹Die mens slaan sy hand selfs aan klipharde rots; hy keer berge van hulle wortels af om.

¹⁰In die rotse breek hy myngange oop, en sy oë sien al die kosbaarhede.

¹¹Hy stop waterare toe; wat verborge is, bring hy na die lig.

¹²Maar wysheid – waar word dit gevind, en waar is die plek van insig?

¹³'n Sterflike mens ken nie die waarde daarvan nie, en in die land van die lewendes word dit nie gevind nie.

¹⁴Die diep waters sê: “In my is dit nie!” en die see sê: “Nie by my nie!”

¹⁵Suiwer goud kan nie daarvoor aangebied word nie, en silwer kan nie as koopprys daarvoor afgeweeg word nie.

¹⁶Met goud uit Ofir kan nie daarvoor betaal word nie, nie met kosbare •oniks of •lasuursteen nie.

¹⁷Goud en glas kan nie daarmee vergelyk word nie, en artikels uit fyngoud het nie ruilwaarde daarvoor nie.

¹⁸Pêrels en rotskristal word nie eers oorweeg nie; 'n sakkie wysheid is meer werd as korale.

¹⁹•Topaas uit Kus kan nie daarmee vergelyk word nie, met suiwer goud kan nie daarvoor betaal word nie.

²⁰Maar wysheid – waar kom dit vandaan, en waar is die plek van insig?

²¹Dit is verborge vir die oë van alles wat leef, vir die voëls van die hemel is dit weggesteek.

²²Die onderwêreld en die dood sê: “Net met ons ore het ons die gerug daarvan gehoor.”

²³God het insig in die pad daarheen, Hy ken die plek daarvan.

²⁴Want net Hy kyk tot by die eindes van die aarde; Hy sien alles onder die hemel,

²⁵sodat Hy die gewig van die wind kan bepaal, en die hoeveelheid water kan vasstel.

²⁶Toe Hy vir die reën vaste reëls neergelê het, 'n pad vir die harde donderslae,

²⁷toe het Hy ook die wysheid gesien, en daarvan vertel; Hy het daaraan 'n vaste plek gegee, en dit ook deurgrond.

²⁸Maar vir die mens het Hy gesê: “Kyk, ontsag vir die Heer, dit is wysheid, en om van kwaad weg te bly, is insig.”