Isaiah 5— AFR20

¹Ek wil oor my geliefde sing: my geliefde se lied oor sy wingerd. My geliefde het 'n wingerd gehad op 'n vrugbare heuwel.

²Hy het dit bewerk, die klippe uitgehaal en edeldruiwe daar geplant. Hy het 'n toring gebou in die middel daarvan, en ook 'n giskuip daarin uitgekap. Hy het verwag dat dit druiwe sou dra, maar dit het wilde druiwe gelewer.

³“ Daarom, inwoners van Jerusalem en manne van Juda, besleg tog tussen My en my wingerd.

⁴Wat moet nog aan my wingerd gedoen word wat Ek nie reeds daarin gedoen het nie? Waarom het Ek verwag dat dit druiwe sou dra, maar dit het wilde druiwe gelewer?

⁵Daarom wil Ek aan julle bekend maak wat Ek aan my wingerd gaan doen: Ek gaan sy doringheining verwyder, sodat dit bewei word. Ek gaan sy gepakte klipmuur afbreek, sodat dit 'n vertrapte plek word.

⁶Ek sal dit 'n verwoeste plek maak; dit sal nie gesnoei en nie geskoffel word nie. Doringstruike en onkruid sal opskiet, en aan die wolke sal Ek opdrag gee om nie 'n druppel daarop te laat reën nie.”

⁷Ja, die wingerd van die Here, Heerser oor alle magte, is die huis van Israel; en die manne van Juda is die plante waarin Hy Hom verlustig. Hy het gewag op reg, maar kyk, daar was regskending, op geregtigheid, maar kyk, daar was hulpgeroep.

⁸Wee hulle wat huis by huis voeg, wat ploegland by ploegland voeg, totdat daar geen plek meer is nie, en julle alleen in die land woon.

⁹Met my eie ore het ek die Here, Heerser oor alle magte, hoor sweer: “Baie huise sal 'n skrikbeeld word – die grotes en mooies is sonder inwoner.

¹⁰'n Wingerd op grond wat in tien dae met twee beeste geploeg kan word, sal een bat lewer, en 'n gomer saad sal 'n efa lewer.”

¹¹Wee hulle wat vroeg in die môre opstaan, naarstig soek na sterk drank, en wat teen skemeraand sloer, dat die wyn hulle kan warm maak.

¹²Daar is lier en harp, tamboeryn en fluit, en wyn by hulle feesmaaltye. Maar op dit wat die Here doen, slaan hulle nie ag nie, en die werk van sy hande sien hulle nie raak nie.

¹³Daarom gaan my volk in ballingskap vanweë 'n gebrek aan kennis; sy geëerdes word mense wat honger is, en sy gepeupel raak uitgedor van die dors.

¹⁴Daarom het die •doderyk sy keel wyd oopgemaak, en sy mond oopgesper sonder perk. Die stad se luisterrykes en gespuis, die lawaaimakers en uitbundiges in haar sal daarin afdaal.

¹⁵Mense sal neergebuig word, manne sal verneder word, hovaardiges sal hulle oë moet neerslaan.

¹⁶Die Here, Heerser oor alle magte, is verhewe in sy regspraak; die heilige God betoon Hom heilig deur geregtigheid.

¹⁷Jong ramme sal wei asof dit hulle weiveld is; en die ruïnes van vetgevoerdes – vreemdes sal daar eet.

¹⁸Wee hulle wat sondeskuld saamsleep met bande van bedrog, en sonde soos met die toue van 'n wa –

¹⁹hulle wat sê: “Hy moet gou maak, sy werk moet vinnig gebeur, sodat ons dit kan sien; die plan van die Heilige van Israel moet ontvou, in vervulling gaan, sodat ons dit kan weet.”

²⁰Wee hulle wat die slegte dinge goed noem, en die goeie dinge sleg, hulle wat die duisternis tot lig maak en die lig tot duisternis, wat bitter soet maak en soet bitter.

²¹Wee hulle wat wys is in hulle eie oë, en hulleself as verstandig beskou.

²²Wee hulle wat helde is by die drink van wyn, en wat bekwame manne is by die meng van sterk drank,

²³wat goddeloses regverdig verklaar vir 'n omkoopgeskenk, en regverdiges hulle reg ontneem.

²⁴Daarom, soos wanneer strooi deur tonge van vuur verteer word, en droë gras in vlamme wegsink, so sal hulle wortel wees soos iets wat verrot, en hulle bloeisel sal as stof opstyg; want hulle het die wet van die Here, Heerser oor alle magte, verwerp, en die woord van die Heilige van Israel het hulle geminag.

²⁵Daarom het die toorn van die Here teen sy volk ontbrand. Hy het sy hand teen hulle uitgestrek en hulle geslaan. Die berge het gebewe, en hulle lyke was soos vullis in die strate. Ondanks dit alles het sy toorn nie bedaar nie, en bly sy hand steeds uitgestrek.

²⁶Hy hef 'n banier op vir 'n nasie wat van ver af kom, en fluit vir een aan die einde van die aarde. Kyk, hierdie nasie kom vinnig, haastig.

²⁷By hom is niemand uitgeput nie, en niemand struikel nie. Hy sluimer nie in en slaap nie; die skorte om sy heupe is nie losgemaak nie, en sy sandaalriempies nie losgeskeur nie.

²⁸Sy pyle is skerpgemaak, en al sy boë is gespan; die hoewe van sy perde is so hard soos vuurklip, en sy strydwawiele kom aan soos 'n stormwind.

²⁹Sy brul is soos dié van 'n leeu. Hy brul soos jong leeus, hy grom en gryp prooi; hy sleep weg, en daar is niemand wat kan red nie.

³⁰Op daardie dag sal hy oor sy prooi grom soos 'n bulderende see. Iemand sal na die land staar, en kyk, daar is 'n beklemmende donkerte; die lig is verduister vanweë die wolke oor die land.