Job 22— ABA

¹Elifas van die land Teman het weer gepraat. Hy het gesê:

²“God kan alles self doen, Hy het nie mense nodig nie, nee, Hy het ook nie slim mense nodig nie.

³Dink jy die Almagtige moet bly wees omdat jy reg gelewe het? Of dink jy dit het Hom gehelp dat jy nooit verkeerd gedoen het nie? Nee.

⁴Job, dink jy dat Hy jou straf omdat jy Hom gedien het, dink jy dat Hy wil sê dit is hoekom jy skuldig is?

⁵Nee, dit is omdat jy baie sleg gelewe het, jy het so baie sonde gedoen dat 'n mens dit nie kan tel nie. Dít is hoekom Hy jou straf.

⁶Ja, jy het jou eie mense se klere gevat, ook toe hulle niks vir jou geskuld het nie, jy het arm mense kaal laat loop.

⁷Jy het nie water gegee vir mense wat moeg is nie, jy het nie kos gegee vir honger mense nie.

⁸Al die grond behoort aan die man wat ryk en sterk is, en sy vriende woon daarop.

⁹Jy het niks gegee vir weduwees nie, jy het weeskinders se goed gevat.

¹⁰Dit is hoekom daar vangstrikke om jou is, dit is hoekom jy nou baie bang geword het.

¹¹Dit het vir jou so donker geword dat jy niks kan sien nie. Dit is soos wanneer daar baie water oor jou vloei.

¹²Jy dink dat God ver bo in die hemel is, ja kyk, Hy is bokant die sterre wat baie hoog is.

¹³En jy vra: ‘Wat weet God? Kan Hy deur die donker wolke sien om mense te oordeel?’

¹⁴Jy dink dat die wolke Hom toemaak sodat Hy nie kan sien nie, jy dink dat Hy bokant die hemeldak loop.

¹⁵Wil jy dan aanhou lewe soos die mense wat vóór jou gelewe het, die mense wat sleg gelewe het?

¹⁶Daardie mense het gesterf toe hulle jonk was, hulle was soos huise wat weggespoel het.

¹⁷Hulle het vir God gesê: ‘Gaan weg van ons!’ Hulle het gesê: ‘Wat kan die Almagtige aan ons doen? Niks.’

¹⁸Hulle het dit gesê vir Hom wat hulle ryk gemaak het. Die mense wat verkeerd doen, dink nie soos ek dink nie.

¹⁹Mense wat reg doen, die onskuldige mense, is bly en hulle lag wanneer hulle sien dat God die sondaars straf.

²⁰Die mense wat reg doen, sê dan: ‘Ons vyande is dood, en alles wat hulle gehad het, het verbrand.’

²¹Job, jy moet vrede maak met God, dan sal dit weer goed gaan met jou.

²²Jy moet luister na wat Hy vir jou sê, jy moet dit goed onthou.

²³As jy terugkom na die Almagtige toe, as jy ophou om sonde te doen, dan sal jy weer word soos jy voorheen was.

²⁴Jy moet onthou dat goud nie méér kosbaar is as stof nie, jy moet onthou dat die beste goud nie méér kosbaar is as die klippe in die rivier nie.

²⁵Dan sal die Almagtige vir jou wees soos goud, soos die beste silwer.

²⁶Ja, dan sal jy bly wees dat die Almagtige jou God is, jy sal weet dat Hy goed wil wees vir jou.

²⁷Jy sal dan tot Hom bid, en Hy sal doen wat jy vra, en jy sal jou geloftes betaal.

²⁸Jy sal besluit oor iets, en dit sal gebeur, daar sal lig wees op jou pad.

²⁹Wanneer God mense onbelangrik laat word, en jy vra dat Hy hulle weer belangrik moet laat word, dan sal God dit doen, Hy red nederige mense.

³⁰God sal 'n mens red, ook wanneer die mens skuldig is. En Hy sal jóú red as jy onskuldig is.”