Psalms 18— 2020

¹Ngiyakuthanda, Simakade, ongamandla ami.

²Simakade, uyidwala lami nenqaba yami, noMkhululi wami, uNkulunkulu wami; uyidwala engikhosela kulo, isihlangu sami, nophondo lwensindiso yami, inqaba yami.

³Ngikhala kuSimakade omele ukudunyiswa, ngisindiswe ezitheni zami.

⁴Izintambo zokufa zangizungeza, izikhukhula zembubhiso zangikhungatha.

⁵Izintambo zendawo yabafileyo zangibamba. Izihibe zokufa zangehlela.

⁶Ekuhluphekeni kwami ngakhala kuSimakade, ngakhala, uNkulunkulu walizwa izwi lami esethempelini lakhe; ukukhala kwami, kwafinyelela ezindlebeni zakhe.

⁷Umhlaba wazamazama, wathuthumela, izisekelo zezintaba zanyakaza, zashukumela emuva naphambili, wavutha.

⁸Ukhafula intuthu ngamakhala akhe, kuthaphuke umlilo oqothulayo emlonyeni wakhe, akhafule amalahle avuthayo.

⁹Uqhekeza isibhakabhaka bese ehla emi ngezinyawo zakhe, phezu kwesigayegaye sobumnyama.

¹⁰Uza endiza, egibele ikherubhi, eshweza ngamaphiko omoya.

¹¹Uzisonge ngobumnyama, wazemboza ngemvula yamafu amnyama bhuqe!

¹²Wendulelwa ngumbani, amafu akhe ehlisa isichotho namalahle avuthayo.

¹³USimakade uyaduma esibhakabhakeni; Ophezukonke uyabhodla, wehlisa isichotho namalahle ankemuzelayo.

¹⁴Uciba ngemicibisholo yakhe, izitha zihlakazeke; umbani ulokhu uthi nyazi, uzidudulela kude.

¹⁵Ngenkathi Wena, Simakade, uzithethisa, lapho uzifutha ngamakhala akho, umphefumulo wakho uziqumbe phansi. Izinzulu zolwandle zavela obala, nezisekelo zomhlaba zaba kwabha.

¹⁶USimakade welule isandla sakhe esezulwini, wangixhakathisa, wangidonsa, engikhipha ezikhukhuleni ezesabekayo.

¹⁷Wangisindisa ezitheni zami ezinamandla; bezinamandla kunami, kodwa Yena wangihlenga.

¹⁸Zingihlasele ngacishe ngabhubha, kodwa uSimakade wangivikela.

¹⁹Ungikhululile kuzona; wangisindisa ngoba engithanda.

²⁰USimakade ungiklomelisile, ngoba ngenza intando yakhe, ungenzele okuhle, ngoba ngimsulwa.

²¹Ngihlala ngihamba ezinyathelweni zikaSimakade, angikuvumeli ukuziphatha kwababi, kungehlukanise noNkulunkulu wami.

²²Ngigcina yonke imithetho yakhe, futhi izimiso zakhe angizishayi indiva.

²³Ngangingenasici phambi kwakhe, ngaziqhelelanisa nesono.

²⁴USimakade wangivuza ngokwenza intando yakhe, ngoba ukubonile ukuthi ngimsulwa.

²⁵Uhlala ethembekile kulabo abethembekile kuye, abangenasici ubavuza ngezipho ezipheleleyo.

²⁶Konenhliziyo emhlophe uzibonakalisa ehlanzekile, kowonakele uzibonakalisa eyisigwegwe.

²⁷NguWena osindisa abazithobayo, ujabhise abaqhoshayo.

²⁸USimakade uNkulunkulu wami, ukhanyisa isibani sami, akhanyise ubumnyama bami.

²⁹Ngokuba ngawe ngingahlasela impi, ngoNkulunkulu wami, ngingeqa ugange.

³⁰Indlela yakho, Nkulunkulu, iphelele, izwi likaSimakade lihlanzekile, uyisihlangu sabo bonke abaphephela kuye.

³¹Ngokuba ngubani onguNkulunkulu ngaphandle kukaSimakade na? Ngubani oyidwala ngaphandle kukaNkulunkulu wethu na?

³²UNkulunkulu ongibhincisa amandla, owenza indlela yami iphelele.

³³Wenza izinyawo zami zibe njengezendluzele, angimise ngiqine ezindaweni zami eziphakemeyo.

³⁴Uqeqesha izandla zami, ukuze ngikwazi ukulwa; izingalo zami zibe namandla okugobisa umnsalo wethusi.

³⁵Wena unginike isihlangu sensindiso yakho, isandla sakho sokunene singiphasile, ubukhona bakho bungenze ngaba mkhulu.

³⁶Wandisile izinyathelo zami phansi kwami, namaqakala ami awabhinyikanga.

³⁷Ngazixosha izitha zami, ngazifica, angibuyanga ngaze ngaziqede nya.

³⁸Ngazilimaza, azakwazi ukuvuka, zawa phansi kwezinyawo zami.

³⁹Wena ungibhincisa amandla ukuze ngimelane nempi, abangivukelayo ubenze bangikhothamela.

⁴⁰Unikele ngezitha zami kimi, nabangizondayo ngabaqothula.

⁴¹Bakhala, kodwa akubangabikho obasindisayo, bakhala nakuSimakade, kepha akaze abaphendula.

⁴²Ngibacolisisa okothuli lupheshulwa yisiphepho, ngibashabalalisa okodaka emgwaqweni.

⁴³Wangikhulula kubantu abangivukelayo. Wangimisa ngaba yinhloko yezizwe, abantu engingabazi bangikhonza.

⁴⁴Banele ukungizwa nje, bangilalela; abantwana babafokazi bayathoba phansi kwami.

⁴⁵Abafokazi babuna, baphuma ezinqabeni zabo begubhazela.

⁴⁶USimakade uyaphila, malidunyiswe idwala lami. Makaphakanyiswe uNkulunkulu wensindiso yami.

⁴⁷UNkulunkulu owangiphindiselela, wenza izizwe zakhonza phansi kwami.

⁴⁸UNkulunkulu ungiphindiselele, wenza abantu bazithobe phansi kwami. Wangikhulula kumuntu oyisidlwangudlwangu.

⁴⁹Ngakho-ke ngiyakumbonga phakathi kwezizwe; Simakade, ngiyakulihubela igama lakho.

⁵⁰Uyenza ibe nkulu insindiso enkosini, wenza isihe kogcotshiweyo wakhe, kuDavide nabozalo lwakhe kuze kube phakade.