Psalms 103— 2020

¹Mbonge uSimakade, mphefumulo wami, konke okungaphakathi kimi makulibonge igama lakhe elingcwele.

²Mbonge uSimakade, mphefumulo wami, ungaze wakhohlwa yimisebenzi yakhe yonke yomusa,

³Yena othethelela zonke izono zakho, owelapha zonke izifo zakho,

⁴okhulula ukuphila kwakho ekubhujisweni, okuqhelisa ngomusa nangobubele,

⁵osuthisa ukulangazelela kwakho ngokuhle, ubusha bakho bubuyiswe njengokhozi.

⁶USimakade ubenzela bonke abacindezelweyo ukulunga nobulungiswa.

⁷Wamazisa uMose izindlela zakhe, nabantu bakwa-Israyeli, izenzo zakhe.

⁸USimakade unobubele nesihawu, uyephuza ukuthukuthela, uvame umusa.

⁹Akathethi njalonjalo, akayigcini intukuthelo yakhe kuze kube phakade.

¹⁰Akasiphathi njengokufanele izono zethu, akasivuzi njengokwamacala ethu.

¹¹Ngokuba njengokuphakama kwezulu phezu komhlaba, unjalo umusa wakhe phezu kwabamesabayo.

¹²Njengokuba impumalanga yahlukene nentshonalanga, uzidedise kangako iziphambeko zethu.

¹³Njengalokhu uyise ebahawukela abantwana bakhe, kanjalo noSimakade uyabahawukela abamesabayo.

¹⁴Ngokuba uyazi ukuthi sibunjwe kanjani, uyakhumbula ukuthi siluthuli nje.

¹⁵Izinsuku zomuntu zinjengotshani; ukhahlela njengembali yasendle,

¹⁶ipheshethwa ngumoya, bese inyamalala, nendawo yayo ingabe isayazi.

¹⁷Kepha umusa kaSimakade uphezu kwabamesabayo phakade naphakade, nokulunga kwakhe kubantwana babantwana,

¹⁸abagcina isivumelwane sakhe, bakhumbule ukwenza iziyalezo zakhe.

¹⁹USimakade umise isihlalo sakhe sobukhosi ezulwini, umbuso wakhe ubusa phezu kwakho konke.

²⁰Bongani uSimakade nina zingelosi zakhe, nina maqhawe anamandla enigcina izwi lakhe nilalele okushiwo yilo.

²¹Bongani uSimakade nina mabandla akhe wonke, nina zinceku zakhe enenza intando yakhe.

²²Bongani uSimakade, nina misebenzi yakhe yonke ezindaweni zonke zombuso wakhe. Mbonge uSimakade, mphefumulo wami.