Job 23— 2020

¹Wayesephendula uJobe, wathi:

²“Nanamuhla ukukhononda kwami kumunyu; isandla sami sinzima, nakuba ngibubula.

³Sengathi ngabe ngiyazi ukuthi ngizomthola kuphi, ukuze ngifike endaweni yakhe.

⁴Bengiyakulwethula udaba lwami phambi kwakhe, umlomo wami ngiwugcwalise ngamazwi empikiswano.

⁵Bengiyakuwazi amazwi abeyokungiphendula ngawo, ngikuqonde abezokusho kimi.

⁶Ubeyakuphikisana nami yini ngamandla akhe amakhulu na? Qha, ubeyongilalela.

⁷Olungileyo ubengaphikisana naye, mina ngikhululwe kumehluleli wami ingunaphakade.

⁸Kepha uma ngiya phambili, akekho lapho, uma ngiya emuva, angimboni

⁹ngakwesokhohlo, lapho ezifihle khona, angimboni; ujikela ngakwesokunene, kepha angimboni.

¹⁰“Ngokuba uyayazi indlela yami; esengivivinyile, ngiyakuphuma nginjengegolide.

¹¹Unyawo lwami lunamathele ezinyathelweni zakhe; ngiyigcinile indlela yakhe, angiphambukanga.

¹²Angichezukanga emyalweni wezindebe zakhe; amazwi akhe ngiwagcinile esifubeni sami.

¹³“Yena akaguquki, ngubani ongamguqula na? Wenza lokhu okufiswa ngumphefumulo wakhe.

¹⁴Uyakukufeza lokho angiqokele khona; nokunye okuningi okusemqondweni wakhe.

¹⁵Ngakho-ke ngiyamesaba nxa ngiphambi kwakhe, uma ngicabanga ngaye ngiba nengebhe ngaye.

¹⁶UNkulunkulu uyidangalisile inhliziyo yami. uSomandla ungethusile,

¹⁷Angibhujiswanga phambi kwesigayegaye, nakuba okumnyama kungisibekele.”