Revelation 2
1 「你愛寫信仔給以弗所教會个使者，講：『該右手拿等七粒星仔、在七盞金燈臺中間行个，恁樣講：
2 𠊎知你所做个：你樣般辛苦工作，樣般忍耐；𠊎也知你無縱壞人，識考驗該兜自稱使徒其實毋係使徒个人，認出佢等係假冒个。
3 你盡有忍耐，識為𠊎个緣故經歷苦難，從來毋識忍毋住。
4 總係，有一件事𠊎愛責備你：你已經失掉先前對𠊎个愛心。
5 你想看仔，你已經墜落到麼介程度！你愛悔改，回復你先前有愛心个行為。你若毋悔改，𠊎愛來，將你个燈臺對原位徙走。
6 總係，你有一個優點：你同𠊎共樣恁惱尼哥拉黨个作為。
7 『聖靈對各教會所講个話，有耳公好聽个，就愛聽！『得勝个人，𠊎愛給佢有權好食上帝樂園中生命樹个果子。』」
8 「你愛寫信仔給士每拿教會个使者，講：『該開始㧯結束、死又復活个，恁樣講：
9 𠊎知你个患難㧯窮苦；事實上你係富足个！𠊎知你被該兜自稱猶太人个譭謗；其實佢等並毋係猶太人，佢等係撒但一黨个人。
10 毋使驚你所會堵到个苦難。看啊，魔鬼愛考驗你等；你等中間有兜人會被佢㧒落監獄；你等愛受十日个苦難。你愛忠心到死，𠊎就賜你生命个冕旒。
11 『聖靈對各教會所講个話，有耳公好聽个，就愛聽！『得勝个人絕對毋會受第二擺死个傷害。』」
12 「你愛寫信仔給別迦摩教會个使者，講：『該有兩邊利个劍个，恁樣講：
13 𠊎知你住个地方就係撒但做王个所在。你對𠊎忠誠；就係𠊎忠心个見證人安提帕在撒但个地盤受害个時，你也無放掉對𠊎个信心。
14 總係，有兜事𠊎愛責備你：你等中間有人照巴蘭个教訓去行；這個巴蘭誘惑巴勒，教唆以色列人犯罪，去食拜過偶像个祭物，又行淫亂个事情。
15 共樣，你等中間也有人照尼哥拉黨个教訓去行。
16 所以，你愛悔改，若無，𠊎會黏時到，用𠊎口中个劍攻擊這兜人。
17 『聖靈對各教會所講个話，有耳公好聽个，就愛聽！『得勝个人，𠊎愛賜給佢該囥等个嗎哪。𠊎也愛給佢一垤白石頭，頂高寫等新个名；這個名，除了接受个人，無人認得識。』」
18 「你愛寫信仔給推雅推喇教會个使者，講：『上帝个孻仔，目珠像火焰恁金，腳像拭金金个銅，佢恁樣講：
19 𠊎知你所做个；𠊎知你个愛心、信心、事奉、㧯耐心。𠊎知你這下所做个比先前還較多。
20 總係，有一件事𠊎愛責備你：你忍受該自稱女先知个耶洗碧。姖教唆引誘𠊎所有个僕人去行淫亂个事，食拜過偶像个祭物。
21 𠊎有給姖悔改个時間，總係姖毋肯離開姖个淫亂。
22 看啊，𠊎愛使姖發病橫在眠床頂；該兜同姖行淫亂个人，除非佢等悔改，無再同姖行淫亂，𠊎就愛使佢等同姖共下受大苦難。
23 𠊎也愛攻擊跈姖个人，治死佢等；各教會就會知，𠊎係該看透人个思想㧯意念个。𠊎愛照你等逐儕所做个，給每一個人得到自家个報應。
24 『論到在推雅推喇其他个人，你等無跈該邪說，無學習所謂撒但个奧秘。𠊎㧯你等講，𠊎毋會再將別个重擔加給你等。
25 總係，你等愛持守你等已經有个，直到𠊎來。
29 『聖靈對各教會所講个話，有耳公好聽个，就愛聽！』」