Revelation 1
1 本書係記載耶穌基督个啟示。上帝交給佢這個啟示，愛佢將短期內一定會發生个事指示上帝个眾僕人。基督差派天使對佢个僕人約翰顯明這兜事，
2 約翰就將所看到个㧯大家講，為上帝个真道㧯耶穌基督所啟示个真理做見證。
3 宣讀這本書个人樣般有福氣！該兜聽這個預言又照其中个記載去行个人實在有福氣噢！因為這一切事情實現个時機會到了。
6 使𠊎等成做一個國，做祭司來服事佢个阿爸上帝。願榮光㧯權能歸給耶穌基督，世世無窮！阿愐。
7 看啊！佢坐雲來囉；每一個人會看到佢，連該兜用槍刺佢个人也會看到佢。佢來个時，地上个萬民攏總會因為佢捶心肝大噭。這個事一定會發生！阿愐。
8 古早存在、這下存在、將來也永遠存在个主—全能个上帝講：「𠊎係阿爾法—就係開始，係亞米茄—就係結束！」
9 𠊎—約翰就係你等个兄弟。𠊎同你等共下有份耶穌个患難、佢个國、㧯忍耐。為到傳揚上帝个真道㧯耶穌所啟示个真理，𠊎識被人關在該名安到拔摩个海島。
10 有一個主日，𠊎受聖靈个感動，聽到有大聲音，像係號筒个聲，在𠊎後背對𠊎講：
11 「愛將你所看到个寫下來，然後將這書卷寄給以弗所、士每拿、別迦摩、推雅推喇、撒狄、非拉鐵非、㧯老底嘉七個教會。」
12 𠊎轉身愛看係麼人對𠊎講話，𠊎就看到七盞金燈臺。
13 燈臺中間有一個像人子个，企在該位，著等縋到腳盤个長袍，胸前繫等金帶。
14 佢个頭那毛像羊毛也像雪恁白；佢个目珠像火焰恁金；
15 佢个腳像火爐中煉過又拭金金个銅；佢个聲像係大水个聲。
16 佢右手拿等七粒星仔，嘴呸出一支兩邊利个劍。佢个面像當晝个日頭。
17 𠊎一看到佢，就仆在佢个腳前，像死掉一樣。佢用右手捍等𠊎，講：「毋使驚！𠊎係開始，也係結束。
18 𠊎係該永遠存在个！𠊎識死過，這下生生，也愛生到永遠。𠊎掌管死㧯陰間个鎖匙。
19 你愛將所看到个，無論係這下抑係將來愛發生个，全部寫下來。
20 你所看到、在𠊎右手个七粒星仔㧯七盞金燈臺个奧秘係恁樣：七粒星仔係七個教會个使者；七盞燈臺就係七個教會。」