Revelation 17
1 拿等七隻碗个七個天使當中，有一個進前來對𠊎講：「你來，𠊎愛俾你看大淫婦所愛受个刑罰；姖就係該起在幾條河壩滣个大城。
2 地上該兜王全部識同這大淫婦行姦淫；世間个人也因為啉姖淫亂个酒，食到醉醉。」
3 𠊎被聖靈感動；天使就帶𠊎去到曠野。𠊎看到一個婦人家騎一隻大紅色个惡獸；該隻惡獸滿身寫等褻瀆个名號，有七隻頭那㧯十支角。
4 該婦人家著等紫色㧯大紅色个衫，歸身掛等金仔、寶石，㧯珍珠。姖个手㨮等金杯，杯肚裝滿可惡之物，就係姖淫亂个屙糟東西。
5 姖个額頭寫等一個奧秘个名號：「大巴比倫，世間个淫婦㧯一切可惡个東西个阿姆！」
6 𠊎又看到該婦人家啉眾聖徒个血，還有該兜為到耶穌做見證來殉道个人个血，食到醉醉。看到姖个時，𠊎感覺非常希奇。
7 天使問𠊎講：「你做麼介感覺希奇？𠊎愛㧯你講這婦人家並姖所騎有七隻頭那㧯十支角个惡獸个奧秘。
8 頭下你所看到該隻惡獸，牠早有，這下無；無幾久後，牠會對無底坑上來，向滅亡行等去。地上个人，佢等个名在創造世界以前無記在生命冊个，一看到該隻早有、這下無、將來又愛出現个惡獸，全部會盡希奇。
9 「這個事愛用智慧來了解。七隻頭那，就係該婦人家所坐个七座山，也係代表七個王。
10 其中五個已經橫掉，一個還在；另外一個還吂來，來个時節也只會停留一下仔定定。
11 該早有、這下無該隻惡獸，就係第八個王；佢也係七個王其中个一個，係向滅亡行等去。
12 「你所看到个十支角係代表十個還吂開始統治个王；總係佢等會承受王權，同該隻惡獸共樣統治一點鐘久。
13 這十個王同心合意，愛將佢等个能力㧯權柄交給該隻惡獸。
14 佢等會同羔羊相㓾；總係羔羊一定會打贏佢等，因為佢係萬主个主、萬王个王。佢所選召、忠心跈佢个人，也一定會得勝。」
15 天使又對𠊎講：「你所看到个大淫婦，姖坐等个幾條河壩就係代表各民族、各種族、逐個國家、㧯各種語言个人。
16 你所看到个十支角㧯該隻惡獸會怨恨該淫婦，將姖所有个一切搶走，使姖歸身光光；牠兜會食姖个肉，放火燒姖。
17 因為上帝將執行佢旨意个意念放在該十個王个心內，使佢等同心，將佢等个統治權交給該隻惡獸，直到上帝个話實現。
18 「你所看到个婦人家，就係管轄地上眾王个大城。」