Revelation 16
1 𠊎聽到對聖殿肚有大聲音向該七個天使講：「你等去，將該七碗上帝个怒氣倒在地上！」
2 第一個天使就去，將佢个碗倒在地上；該兜有惡獸个記號㧯拜過牠个像个人，身上就發盡臭又盡毒个瘡仔。
3 第二個天使將佢个碗倒在海中；海水就變做像死人个血一樣，海肚个生物就死淨淨。
4 第三個天使將佢个碗倒在該兜河壩㧯水源頭，水就變做血。
5 𠊎聽到該管理水个天使講：「古早存在、這下存在个至聖者啊，你係公義个審判者。
6 佢等識流聖徒㧯先知个血，這下你用血給佢等啉；這係佢等應該得到个！」
7 𠊎又聽到有聲音對祭壇發出講：「主—全能个上帝啊，你个審判係真實又公義个！」
8 第四個天使將佢个碗倒在日頭頂高，使日頭可以用烈火來㸐人。
9 人被盡燒个熱氣㸐到，就褻瀆該有權支配這兜災難个上帝。佢等還係毋悔改，毋將榮光歸給上帝。
10 第五個天使將佢个碗倒在該隻惡獸个座位頂。惡獸个國就變做烏暗，人因為盡痛苦，就咬自家个舌乸。
11 佢等因為所受个痛苦㧯身上所發个瘡仔就褻瀆天頂个上帝，還係毋悔改來離開佢等邪惡个行為。
12 第六個天使將佢个碗倒在幼發拉底大河个頂高，河壩水就燥掉，來為該兜對東方來个王預備一條道路。
13 接等𠊎看到有三個像蝦蟆个邪靈，對惡龍个嘴、惡獸个嘴，㧯假先知个嘴出來；
14 佢等係該兜會行奇事个鬼个靈。佢等出去召集全世界所有个王，準備佢等在全能上帝偉大个日仔來相㓾。
15 主講：「愛細膩噢！𠊎會像賊仔一樣忽然臨到！隨時警醒、一直著等衫褲个人有福氣了！因為佢毋會赤身露體行路，被人看到見笑。」
16 該三個邪靈就將列王聚集在一個所在，希伯來話安到哈米吉多頓。
17 第七個天使將佢个碗倒在空中。有大聲音對聖殿肚个寶座該位發出，講：「完成了！」
18 跈等就𥍉爧、有𠾐𠾐滾个聲、響雷公个聲、㧯大地動；自從地球有人類以來，吂識有恁厲害个地動！
19 巴比倫大城裂做三析，列國个城市也橫淨淨；因為上帝記得巴比倫大城个罪惡，罰它啉該杯上帝大發譴个烈酒。
20 所有个海島全部毋見掉；所有个山也無掉去。
21 大冰雹對天頂落在人个身上，一垤約有五十公斤恁重；因為這冰雹个災難極悲慘，人就褻瀆上帝。