1統治者啊，你等正經講正義係麼？你等正經照公當審判人民係麼？
2毋係！你等一心想愛作惡；你等在世間行強暴个事。
3作惡个人一出世就迷失方向；講花撩个離開母胎就行差路。
4佢等非常惡毒，像毒蛇一樣；塞等耳公，像耳聾个飯匙銃，
5聽毋到搞蛇人歕笛仔个聲，也聽毋到魔術師唸咒个聲。
6上帝啊，求你敲斷佢等嘴肚个毒牙！上主啊，求你挷掉該兜獅仔个大牙！
7願佢等像河壩水燥掉，像細路个草被人踐踏。
8願佢等像蝓螺恁樣糜掉，像落掉个胎無見到日頭。
9你等用竻樹來燒火，鑊仔還吂燒，大風將青青吂燥个㧯燒等个共下吹走；像恁樣，願佢等遽遽受消滅。
10義人看到罪人受報應就歡喜吶天；佢等愛在作惡个人血河中行倒轉來。
11恁樣，人愛講：「義人正經有善報；斷真有一位上帝在審判世界！」