1上帝啊，憐憫𠊎，求你憐憫𠊎，因為𠊎倚靠你。𠊎愛囥在你个翼胛下求你保佑，等到所有个災難過去。
2𠊎愛大聲求喊至高个上帝，就係賜𠊎一切需要个上帝。
3佢會對天頂伸手救𠊎；佢會逐走壓迫𠊎个人。上帝會對𠊎顯出佢不變个慈愛㧯信實。
4𠊎被仇敵圍困；佢等像愛食人个獅仔。佢等个牙齒像槍、像箭；佢等个舌乸像利劍。
5上帝啊，願你个尊榮超過諸天！願你个榮光充滿全地！
6敵人設羅網愛捉𠊎；𠊎被災難壓到背痀痀。佢等在𠊎个面前挖陷阱，自家反轉跌落去。
7上帝啊，𠊎心堅定，𠊎心堅定；𠊎愛吟詩，𠊎愛唱歌頌讚你！
8𠊎个心神啊，好醒了！琴啊，瑟啊，好醒了！𠊎愛喊日頭䟘起來！
9主啊，𠊎愛在列國中感謝你！𠊎愛在萬民中唱歌頌讚你！
10你不變个慈愛大到堵天；你个信實達到穹蒼。
11上帝啊，願你个尊榮超過諸天！願你个榮光充滿全地！