Bible

1 上主至大！在𠊎等上帝个城內，在佢个聖山頂，佢應當受最大个讚美！ 2 上帝个錫安山盡靚盡高；大君王个城使萬民歡喜。 3 上帝在城个宮殿底背；佢顯明自家係避難所。 4 列邦个王聚集共下，相共來攻打錫安山。 5 佢等一看到這城就大著驚；佢等驚到無葛煞，遽遽逃走。 6 在該位佢等又著驚又痛苦，像婦人家𫱔子个時恁艱苦， 7 像他施个貨船被東風打爛恁慘。 8 在上主、萬軍个元帥—𠊎等上帝个城內，頭擺𠊎等所聽講个，這下𠊎等看到了；上帝一定會保護這城，直到永遠。 9 上帝啊，在你个聖殿中，𠊎等想念你不變个慈愛。 10 上帝啊，滿天下个人頌讚你；你个名傳遍全世界！你用正義統治； 11 願錫安山歡喜！願猶大个城市快樂，因為你个審判公正！ 12 你等愛𫟧等錫安來行，算它个城樓看有幾多； 13 愛詳細看城牆㧯城堡，好㧯你等个後代傳講： 14 這上帝永永遠遠係𠊎等个上帝；佢一定會世世代代帶領𠊎等。