Bible

1 哈利路亞！唱歌頌讚𠊎等个上帝係樣般美善！讚美佢係盡快樂，也係盡適當个事！ 2 將耶路撒冷重新起起來个就係上主；召集流亡个以色列人轉來个也係佢。 3 佢醫好心肝破碎个人，將佢等个傷口包起來。 4 佢制定星辰个數目，為它兜每一個安名。 5 𠊎等个主最大，滿有能力；佢个智慧無人能推測。 6 上主扶持卑微个人；佢使壞人橫到貼貼。 7 愛用感謝个心唱歌頌讚上主，彈豎琴奏樂歌頌𠊎等个上帝。 8 佢使烏雲遮天，落雨滋潤大地，使群山生青草。 9 佢賜食物給獸類，㧯緊噭个細烏鴉。 10 佢無中意馬仔个力大，無合意人个腳盡會走。 11 上主歡喜敬畏佢个人，喜愛仰望佢慈愛个人。 12 耶路撒冷啊，愛頌讚上主！錫安啊，愛讚美你个上帝！ 13 佢使你个城門堅固；佢賜福給你个子女。 14 佢保守你个邊界平靜；佢俾你食上等个麥仔到飽飽。 15 佢向大地發出命令；佢个話黏時就傳遍。 16 佢降个雪像羊毛；佢委个霜像塵灰。 17 佢使冰雹像石仔落下；佢吹寒風，麼人企得住？ 18 佢一命令，霜雪冰雹就溶掉；佢用風一吹，水就流動。 19 佢將佢个話啟示給雅各，將佢个規定㧯法則傳給以色列。 20 佢無恁樣對待別个國家；佢等全無了解佢个法則。哈利路亞！