Bible

1 𠊎个上帝、𠊎个王啊，𠊎愛傳揚你个偉大！𠊎愛頌讚你个名，直到永永遠遠！ 2 𠊎愛逐日頌讚你；𠊎愛讚美你个名直到永遠！ 3 上主至大，最堪得受讚美；佢个偉大，無人測量得出。 4 世世代代愛宣揚你个作為；佢等愛傳講你大能个工作。 5 佢等愛講起你个榮光㧯尊嚴；𠊎愛緊唸你奇妙个作為。 6 佢等愛講論你得人驚个作為樣般有能力；𠊎愛宣揚你个偉大。 7 佢等愛傳揚你豐盛个良善，歡喜唱歌來頌讚你个公義。 8 上主有恩典㧯憐憫，無隨便發譴，滿有不變个慈愛。 9 上主恩待萬有，憐憫佢所造个一切。 10 上主啊，你所造个一切愛感謝你；你忠心个子民愛頌讚你。 11 佢等愛講起你王權个榮光，談論你个大能； 12 佢等愛使世間人知你大能个作為，認識你國度个榮光㧯尊嚴。 13 你个國度永遠長存；你个王權直到萬代。上主个應許全部信實可靠；佢所做个一切顯出佢个慈愛。 14 會跌倒个，上主扶等佢等；被人壓制个，佢扶持佢等。 15 眾生个目珠全部仰望你；你照時節賜食物給佢等。 16 你个手一下打開，眾生就得到飽足。 17 上主所行个作為全部係公義；佢所做个一切顯出佢个慈愛。 18 上主親近所有求喊佢个人，就係一切誠心求喊佢个人。 19 佢愛成全敬畏佢个人个心願；佢愛聽佢等个求喊，拯救佢等。 20 上主保護一切敬愛佢个人；總係佢愛消滅所有邪惡个人。 21 𠊎愛開嘴讚美上主；願一切受造个頌讚佢个聖名，直到永永遠遠。