Bible

Psalms 137

Chinese (T) - TNV2012

1 𠊎等坐在巴比倫个河壩滣，一想到錫安就忍毋住噭出來！

2 在河壩滣个柳樹頂，𠊎等將豎琴掛起來。

3 捉𠊎等來个人喊𠊎等唱歌；蹧踏𠊎等个人喊𠊎等娛樂佢等。佢等講：「來！為𠊎等唱一條錫安歌！」

4 𠊎等身在外邦个土地上，樣做得唱上主个詩歌呢？

5 耶路撒冷啊，若係𠊎毋記得你，願𠊎个右手瘸掉，毋會再彈琴！

6 𠊎若係毋記得耶路撒冷，若無看你做最大个快樂，願𠊎个舌乸黏上齶，永遠不能吟詩唱歌！

7 上主啊，莫毋記得以東人个惡噢！佢等在耶路撒冷淪陷該日盡喊講：「拆掉它！拆掉它！連根挷掉它！將它踏到貼貼！」

8 巴比倫啊，你會被人毀滅了！報復你，像你恁樣對待𠊎等个，佢係樣般有福氣啊！

9 將你个孲𤘅仔捉去，將佢等抨在石頭頂个人，佢係樣般有福氣啊！