Psalms 109
1 𠊎所頌讚个上帝啊，求你毋好一直恬恬。
2 邪惡詭詐个人攻擊𠊎。佢等講花撩來譭謗𠊎，
3 用惡毒个話來中傷𠊎；佢等無緣無故攻擊𠊎。
4 𠊎惜佢等，為佢等祈禱，總係，佢等卻同𠊎作對。
5 佢等用惡報善，用怨恨報愛心。
6 求你派無公正个法官來審判𠊎个仇敵，用一個同佢作對个人來告佢。
7 願佢受審判，被人定罪；願佢个祈禱也算犯罪！
8 願佢个壽命縮短，別人搶佢个職位！
9 願佢个子女變孤兒，佢个𡜵娘成做寡婦！
10 願佢个子女流浪做乞食，對乞食寮底背被人逐出來！
11 願債主拿走佢所有个財產，生份人搶走佢勞碌所得个！
12 願佢得毋到人个慈悲，佢个孤兒得毋到憐憫！
13 願佢个後代全部絕掉，佢个姓傳毋到第二代！
14 願上主記等厥祖先个罪惡，莫毋記得厥姆个過犯！
15 願上主永遠記等佢等个罪，使世間人完全毋記得佢等！
16 因為佢從來毋識想到慈悲，只有知壓迫衰過个窮苦人，甚至殺害傷心無倚靠个人。
17 佢盡好咒詛，願咒詛臨到佢！佢毋肯祝福，願祝福遠離佢！
18 佢用咒詛來裝備自家，像著外袍；願咒詛像水一樣流入佢个身體，像油恁樣一直透入佢个骨頭！
19 願咒詛像衫恁樣黏等佢，像腰帶一樣常常捆等佢！
20 願上主恁樣責罰𠊎該兜對敵，報應該兜講壞話攻擊𠊎个人。
21 總係，至高个上主啊，求你因為你个名來幫助𠊎，照你至善个慈愛來拯救𠊎！
22 因為𠊎窮苦無倚靠；𠊎个內心傷痛至極。
23 𠊎像臨暗个日影漸漸消失，像一隻草蜢一樣被人拂掉。
24 𠊎禁食到膝頭痠軟，身體瘦到賸皮包骨。
25 仇敵看到𠊎就笑𠊎；佢等緊搖頭侮辱𠊎。
26 上主—𠊎个上帝啊，求你幫助𠊎；求你照你不變个慈愛拯救𠊎！
27 俾𠊎个仇敵知這係你个大能，這件事係你—上主自家所行个。
28 就算佢等咒詛𠊎，你還係愛祝福𠊎。願迫害𠊎个人見笑，你个僕人卻得到歡喜。
29 願𠊎該兜仇敵著等羞辱，被見笑像外袍恁樣包等。
30 𠊎愛出聲大大感謝上主；𠊎愛在大聚會中讚美佢，
31 因為佢為窮苦个人伸冤，救佢脫離定佢死罪个人。