Proverbs 7
1 孻仔啊，愛遵守𠊎个話，毋好毋記得𠊎个誡命。
2 遵守𠊎个誡命，你就會有豐盛个生命；愛守𠊎个教示，像保護自家个目珠仁。
3 愛䌈在你个手指頭，愛刻在你个心版項。
4 愛對智慧講：「你係𠊎个姊妹」；愛將見識準做你个親人。
5 姖等就會幫助你遠離淫婦，離開別人嘴甜舌滑个𡜵娘。
6 有一擺，𠊎在屋肚對窗門看下去，
7 看到盡多戇直个後生人；𠊎特別注意其中一個頭腦簡單个。
8 佢在街路近轉角个地方，行入一個淫婦住个巷肚，
9 日頭落山後，天暗了，在暗疏疏當中，行近姖个門口。
10 𠊎看到一個婦女出來迎接佢，打扮像娼妓，有詭詐个心思。
11 姖一溜裡放蕩毋知見笑，時常在街項行來行去，
12 有時在街頭巷尾，有時在市場肚引誘人。
13 姖拉到該後生人，㧯佢唚嘴，毋知見笑對佢講：
14 「𠊎今晡日還願獻祭，屋下還賸盡多牲儀，
15 所以𠊎出來尋你，盡想愛㧯你見面，無想到在這位堵到你！
16 𠊎已經拿埃及彩色床單鋪好𠊎个眠床，
17 用沒藥、沉香、桂皮，將眠床薰到香香。
18 來啊，𠊎等享受愛情，盡情歡樂，直到天光。
19 𠊎个老公無在屋下，去盡遠个地方旅行。
20 佢帶一大筆錢去，到月半正會轉來。」
21 女人用阿媚奉承引誘佢，用嘴甜舌滑个話迷惑佢。
22 後生人即時跈等姖行，像牛被人牽去屠宰場，又像鹿仔跌落陷阱肚，
23 直到利箭射穿佢个心肝；佢像鳥仔飛入羅網，完全毋知自家个生命在危險中。
24 孻仔啊，你等這下愛聽從𠊎，愛注意聽𠊎所講个話。
25 毋好俾淫婦迷惑你等个心；毋好戇神戇神跈等姖去。
26 姖已經使好多人橫倒，有盡多男人被姖害死。
27 你去厥屋下，係行黃泉路，落死亡陰間。