Proverbs 6
1 孻仔啊，你若答應代鄰舍做擔保，抑係代毋識个人扼手簽約還債，
2 你就被自家講過个話纏到，被自家答應个話落到。
3 孻仔，你既然落在鄰舍个手中，愛恁樣來救自家：愛遽遽謙卑下來，求對方解除契約。
4 你做毋得睡目，也毋好啄目睡。
5 愛救自家，像鹿仔閃開打獵人个手，像鳥仔脫離捉鳥仔个手。
6 懶尸人啊，愛去尋蟻公；查看牠兜樣般生活，好成做有智慧个人。
7 蟻公無領袖，無官長，無統治者；
8 總係，牠兜在熱天預備食物，在收割个時節囤積糧食。
9 懶尸人啊，你愛睡到幾時？你幾多點鐘正愛䟘床呢？
10 你講：「俾𠊎啄痀休息一下，睡加一下仔，揇等手歇睏一下。」
11 總係，貧窮會忽然間像強盜來搶你；缺乏會像土匪來攻打你。
12 該兜毋做正當事業个壞人，行來行去講花撩話欺騙人。
13 佢等用目珠、手腳，打暗號來欺騙你。
14 佢等个壞心術時時設計，製造紛爭。
15 所以，災難會遽遽臨到佢等；佢等會忽然敗壞，無法好救。
16 上主所怨恨个有六項，連佢所惱个共有七項，
17 就係：驕傲个目珠，講肨風个舌乸，殺害無辜个手，
18 詭計多端个心，奔走邪路个腳，
19 肨風講謠言做假見證，在朋友中間教唆是非。
20 孻仔啊，愛謹守若爸个誡命，毋好離開若姆个教示；
21 愛一直刻在心肚，掛在你个頸筋項。
22 佢等个教訓會帶領你所行个路，暗晡時保守你，日時頭交帶你。
23 因為誡命係燈，教示係光，教訓㧯責備會指示你人生个道路，
24 會保守你遠離壞婦人家，㧯嘴甜舌滑个淫婦。
25 你心中毋好被姖个美色迷到，也毋好被姖个眼拐捉去；
26 因為妓女會害你到只賸一垤餅，別人个𡜵娘也會將你个老命收掉。
27 人若係將火囥在懷中，敢毋會燒掉自家个衫？
28 人在燒等个火炭中行，腳敢有可能毋會燒傷？
29 同鄰舍个𡜵娘共下睡个，也像恁樣；親近別人个𡜵娘个，一定會受責罰。
30 賊仔因為肚飢偷拿食物充飢，人較毋會藐視佢；
31 總係被人捉到，就愛賠人七倍，將佢家中所有个，全部賠出來。
32 同別人个𡜵娘通姦實在當戇；恁樣做个人定著會害死自家。
33 佢一定會受羞辱被人打；佢个見笑永遠也洗毋淨；
34 因為嫉妒會使老公大發譴，報仇个時，佢一定毋會留情。
35 佢無愛接受遮羞費，較多禮物佢也毋收。