Proverbs 31
1 下背係利慕伊勒王个話，係佢个阿姆教訓佢个箴言：
2 𠊎个孻仔，𠊎親生个孻仔，𠊎祈禱許願得來个孻仔，𠊎愛樣般教你正好呢？
3 你毋好在女人身上耗費你个精力；這種事識害盡多君王失敗。
4 君王做毋得噢，利慕伊勒啊，君王做毋得啉酒；王子做毋得貪釅酒。
5 佢等若係啉酒，會毋記得國法，也會剝削一切困苦人个權利。
6 釅酒係給面對死个人，葡萄酒係給傷心个人；
7 俾佢等啉，俾佢等毋記得自家个窮苦；俾佢等毋使緊想自家个不幸。
8 你愛為無權出聲个人講話，也愛為一切衰過个人伸冤。
9 你愛代佢等出聲，愛公當判斷，愛維護貧窮人㧯艱苦人个權利。
10 賢慧个𡜵娘實在盡難得噢！姖个價值比珠寶還較貴重！
11 姖个老公做得放心信賴姖，收入定著毋會毋罅用。
12 姖一生人使老公得到好處，一直毋會使佢有麼介損害。
13 姖尋羊毛㧯麻紗，歡喜煞猛做衫褲。
14 姖也像商船共樣，對遠方運糧食來。
15 姖天還吂光就䟘床，為全家人準備食物，指點分配使女工作。
16 姖看中意个田地就買下來，用自家个力量耕種葡萄園。
17 姖繫𢫮腰帶，煞猛做事，雙手盡出力，勞碌工作。
18 姖知自家所經營个有錢賺，屋下个燈火點光光做到半夜。
19 姖為自家紡線，又為自家經布。
20 姖大方救濟貧窮人，伸雙手幫助困苦人。
21 落雪天姖毋使為屋下人愁，因為全家人有過冬个衫褲。
22 姖為自家做好繡花毯仔，著麻紗㧯紫色布做个衫。
23 姖个老公受人尊重，係地方領袖，在城門口同本地个長老共下坐。
24 姖做幼麻布个衫去賣，又做腰帶賣給生理人。
25 能力㧯尊貴做姖个衫褲；想到將來姖就歡頭喜面。
26 姖講个話語當有智慧，所講个係慈愛个教訓。
27 姖關心家務，毋肯食閒飯。
28 姖个子女大聲講，姖係有福氣个人；姖个老公也誐𧩣姖，講：
29 「賢慧个婦女有盡多，總係你超過姖等儕。」
30 美貌係靠毋住个，人靚也係暫時个；只有敬畏上主个婦女應當受稱讚。
31 願姖享受勞碌所得个；願姖个成就公開表揚。