Proverbs 30
1 下背係雅基个孻仔亞古珥个箴言；這人對以鐵㧯烏甲講：
2 𠊎像頭牲，無別人恁聰明；世間人个智慧，𠊎攏總無。
3 𠊎毋識學過智慧，也毋認識至聖者。
4 麼人上過天頂又下來？麼人能用手巴掌捉風？麼人有辦法用衫包水？有麼人定過地个界限？佢係麼人，名安到麼介？厥孻仔个名安到麼介？假使你知，拜託㧯𠊎講！
5 上帝个話逐句全部係純潔个；佢像盾牌保護所有投靠佢个。
6 佢所講个話語，你做毋得加添麼介，驚怕佢會責備你，指出你係花撩牯。
7 上帝啊，有兩項事情，求你在𠊎吂死以前答應𠊎：
8 求你使虛假㧯花撩遠離𠊎；使𠊎毋會忒苦也毋會忒發；賜給𠊎所需要个飲食就好，
9 驚怕𠊎忒好額，會毋認你，就講：「上主係麼人呢？」又驚怕𠊎忒苦，會去偷拿，就羞辱𠊎上帝个名。
10 毋好對做主人个批評佢个僕人，驚怕僕人咒罵你，你也愛受責罰。
11 有兜人咒罵爺仔，也毋肯祝福阿姆。
12 有兜人恅到自家盡淨浰；其實滿身無洗淨盡屙糟。
13 有兜人恅到自家盡完美，總係佢个目珠顯出驕傲。
14 有兜人尖牙利齒，愛吞食地上个困苦人㧯世間个貧窮人。
15 湖蜞有兩個妹仔，緊講：「給𠊎！給𠊎！」毋會滿足个有三項，連毋講「罅」个共有四項，
16 就係：陰間，毋會𫱔个婦人家，天旱無水个土地，毋會講「罅了！」个火。
17 嘲謔阿爸，藐視又毋聽從阿姆个，厥目珠會被山壢个烏鴉啄出來、被細鷹鳥食掉。
18 𠊎想毋解奇妙个事有三項，連𠊎所毋了解个共有四項，
19 就係：鷹鳥在空中飛个路，蛇哥在大石頂爬个路，船仔在海上行个路，男女交往个路。
20 淫婦个路係恁樣：姖食了，將嘴一拭就講：「𠊎無做壞事！」
21 使大地搖動个有三項，連地㧡毋贏个共有四項，
22 就係：奴才做王，戇檔人得到飽，
23 當得人惱个細妹仔出嫁，使女爭到頭家娘个地位。
24 地上有四種細个動物，總係非常聰明：
25 蟻公毋係有力个動物，總係它知夏天預備食物；
26 石獾毋係強壯个動物，總係牠會在巖石中做竇；
27 草蜢無王，總係它兜會擺陣前進；
28 壁蛇，人用手捉得到它，總係它會住在王宮肚。
29 腳步威風个有三項，連行動威風个共有四項，
30 就係：獸類中最強壯，無驚麼介个獅仔；
31 盡風神个雞公；山羊牯；㧯統領大軍个君王。
32 假使你做戇檔个事，自高自大，抑係陰謀壞事，就愛用手揞嘴！
33 摝牛乳，會得到乳油；打鼻公，鼻公會出血；撩人發譴，會惹起爭端。