Proverbs 25
1 以下所寫个也係所羅門个箴言，係猶大王希西家宮廷个人所抄个。
2 將事情囥起來係上帝个榮耀；將事情查清楚係君王个光榮。
3 君王个心盡難了解；像天恁高，像地恁賁。
4 先除去銀仔个雜質，銀匠正能打做東西；
5 先除去君王面前个奸臣，政府正能企在正義頂高。
6 你毋好在王面前展奢鼻，毋好在大官个位仔企等。
7 等人來對你講：「請坐上橫頭」，贏過人來喊你讓位給大人物。
8 毋好隨便出庭做證；若有別人指出你个證言錯誤、使你見笑，你愛樣般正好呢？
9 你㧯鄰舍發生爭執，最好私下和解；毋好洩漏別人个祕密，
10 免得聽到个人就侮辱你，你个臭名就無法度除掉。
11 一句話講到當好勢，就像金蘋果放在銀盤肚。
12 智慧人个勸話對聽從个人來講，比金耳環㧯純金个妝飾品較有價值。
13 忠誠个使者使差派佢个人心神爽快，就像熱天割禾時節个涼水一樣。
14 誇口愛送禮，無實行个，就像有風有雲，無落雨。
15 耐心个勸話會說服掌權个人；溫柔能贏過剛強。
16 尋到蜂糖食罅就好；食忒多你就會嘔掉。
17 毋好常常過家尋鄰舍，勞攪佢忒多佢會惱你。
18 做假見證陷害鄰舍，就像棍仔、刀劍㧯利箭會害死人。
19 患難个時，投靠無忠誠个人，就像蛀牙咬東西，跛腳行路。
20 對傷心个人唱歌，就像冷天脫厥衫，又像在傷口委鹽。
21 你个敵人若係肚飢，愛拿飯給佢食，若係嘴燥，愛拿水給佢啉；
22 你恁樣行會使佢見笑到無葛無煞；上主也會獎賞你。
23 唆慫是非惹起怒氣，就像北風帶來大雨。
24 甘願單獨在屋頂个一角，無愛㧯潑婦共下住大屋。
25 聽到遠方來个好消息，就像嘴燥个時食涼水。
26 義人在邪惡人面前低頭讓步，像摝渾个泉水、㩢屙糟个井水。
27 食忒多蜂糖毋好；展風神也係有害。
28 毋曉得節制个人，像拆掉圍牆个城。