Proverbs 24
1 毋好嫉妒壞人，毋好想愛同佢等做伴；
2 因為佢等个心計謀兇暴个事，佢等所講个全係傷害人个話。
3 家庭係用智慧來建造，係通過了解得到穩固；
4 因為有智識，屋肚也充滿各種珍奇美好个寶物。
5 有智慧个人大有能力；有智識个人力上加力。
6 相㓾愛有好計謀；參謀多就能打贏。
7 智慧係超過戇人所能了解个；佢等在會議中毋敢開嘴講話。
8 計謀做壞事个，就安到陰謀家。
9 戇檔人个計謀就係罪惡；傲慢人盡得人惱。
10 你在患難个時若係失志無膽，你个力量就盡有限。
11 人無辜判死刑，你愛去搶救；佢被人拉去愛㓾，你愛拉轉來。
12 你若係講：「這事情𠊎等毋知」；敢講該鑒察人心个上帝會毋知係麼？保護你生命个，佢非常清楚！佢愛照逐儕所行个來報應。
13 孻仔啊，愛食蜂糖，因為對你有好處；食蜂藪滴下个蜂糖，你會感覺甘甜。
14 你也愛知，智慧對你个心靈也係恁樣；你若尋到，前途就光明，你个將來也毋會絕望。
15 惡棍啊，毋好埋伏攻擊義人个家；毋好破壞佢个屋；
16 因為義人雖然跌倒七擺，佢還會䟘起來；總係，災禍一到，邪惡个人就會橫到貼貼。
17 看到你个仇敵跌倒，毋好歡喜；佢逕倒个時，你个心毋好快樂；
18 驚怕上帝看到你个壞心就無歡喜，然後將佢个怒氣對仇敵身項徙走。
19 毋好因為壞人生活好勢來發閼；也毋好嫉妒邪惡个人；
20 因為壞人無前途，邪惡个人無指望。
21 孻仔啊，愛敬畏上主，尊敬君王；也毋好同悖逆个人共下結交，
22 因為這兜人一下仔就會滅亡。你敢毋知上帝㧯君王會降災難係麼？
23 下背也係智慧人个箴言：審判个時毋好看人个情面。
24 麼人對壞人講：「你無罪」，萬民會咒詛佢，列國會攻擊佢。
25 總係責罰犯罪个會凡事順利；各樣个祝福也會臨到佢身項。
26 誠實个回答表示真實个友情。
27 愛先有謀生个把握，田園也愛整理好勢，正來起屋，成家立業。
28 毋好隨便做證來害鄰舍；也毋好用嘴欺騙人。
29 毋好講：「人對𠊎恁樣，𠊎也愛對佢恁樣！𠊎愛照佢所行个報復佢！」
30 𠊎路過懶尸人个田地、無常識个人个葡萄園；
31 看竻仔當多，雜草滿遍係，石牆也崩掉。
32 𠊎緊看緊想个時，就得到一個教訓：
33 你睡加一下仔，啄痀休息一下仔，揇等手歇睏一下仔；
34 總係貧窮會忽然間像強盜來搶你，缺乏會像土匪來攻打你。